O PP denuncia que Santiago "pode perder" os fondos de modernización turística por "non ter un plan"
Borja Verea traslada que o Goberno local "nin sequera" puxo en marcha a Oficina Técnica do Plan, que non se informou aos axentes turísticos e económicos da cidade e que hai erros na documentación.
Por E.P. | SANTIAGO DE COMPOSTELA | 26/03/2022 | Actualizada ás 12:30
O deputado popular e presidente da xestora do partido na capital galega, Borja Verea, denunciou no Parlamento de Galicia que Santiago de Compostela "pode perder" os fondos de modernización turística por "non ter un plan" para o sector turístico. Verea explicou que fronte á planificación e estratexias que puxo en marcha a Xunta de Galicia no sector, o Concello da capital galega non ten "nin plan, nin estratexia, nin investimento específico".
O deputado popular incidiu en que a consecuencia da "paralización" causada polos responsables locais será que a cidade vai perder "todo o financiamento adxudicado para o seu plan de modernización turística".
O Plan de Sustentabilidade Turística de Santiago de Compostela é o principal mecanismo de colaboración entre o Goberno nacional, a Xunta e o Concello para a modernización do sector turístico, remarca. No caso de Santiago, adquiriu 3 millóns de euros e a execución do plan corre a cargo do Concello compostelán, segundo un comunicado do grupo popular.
Con todo, Verea traslada que o Goberno local "nin sequera" puxo en marcha a Oficina Técnica do Plan, que non se informou aos axentes turísticos e económicos da cidade "demostrando unha falta total de transparencia" e que hai erros na documentación.
