División no PP de Santiago; o médico Fernando Mayo pide un congreso local apoiado por 200 militantes

O médico compostelán Fernando Mayo Ferreiro está disposto a dar a batalla interna no PP de Santiago para converterse no vindeiro líder local. Arroupado por máis de 200 persoas, afiliados e simpatizantes esta fin de semana nun hotel da capital galega volveu pedir a convocatoria do tan esperado congreso local do Partido Popular e aproveitou o acto para presentar o seu plan de acción.

Militantes histórico como María Jesús Torres ou José Manuel Otero destacaron a necesidade dun cambio na política interna do PP en Santiago, mentres que Mayo destacou "aos verdadeiros propulsores" do seumovemento; "as bases, os afiliados, os que aman, defenden e defenderon ao partido incondicionalmente durante tantos anos, e a quen, poucas veces, se lles tivo en conta".

Ademais, destacou que a xestión actual é nefasta, tradicional, arcaica, obsoleta e impropia dunha sociedade moderna". Denunciou que o modelo presidencialista provoca a desafección política das bases, sendo esta, consecuencia do "hastío de pertencer a un partido que os utiliza só en períodos electorais, manténdoos á marxe e no esquecemento o resto do tempo", xerando así, unha "sangría incesante de afiliados e posteriormente un fracaso electoral, mentres nas eleccións autonómicas e xerais os resultados obtidos polo partido, son óptimos e extraordinarios".

Mayo cre que un modelo de xestión diferente e mellor no PP de Santiago " é posible". Por iso, apostou pola participación e a elección de cargos e candidatos polos afiliados, é dicir, desde as bases.  En relación ás críticas xeradas desde a proclamación da súa precandidatura, Mayo, pediu respecto. Por outra banda, solicita á xestora, que ordene, organice e prepare o partido para o próximo Congreso Local, deixando de usurpar funcións municipais, que non lle corresponden, coa intención de promocionarse politicamente, xerando así, unha desigualdade de condicións entre as dúas posibles candidaturas.