A Xunta non quere que se controle a subida de prezos dos alugueres
A patronal da construción di o decreto do Goberno central contra a guerra é "claramente mellorable" e apunta que haberá que "reconducir" as obras en execución.
Por Europa Press / Redacción | VIGO | 29/03/2022 | Actualizada ás 12:00
A Xunta de Galicia advertiu este martes de que a medida de limitar a subida de alugueres ao 2 %, incluída no plan de choque avanzado polo Goberno para paliar as consecuencias da guerra de Ucraína, é "totalmente ineficaz" e non ten en conta os recursos de propietarios e inquilinos.
Así o trasladou a conselleira de Medio Ambiente, Territorio e Vivenda, Ángeles Vázquez, en declaracións aos medios antes de participar nun encontro coa Asociación de Construtores de Pontevedra, no que tamén participou o director do Instituto Galego de Vivenda e Solo (IGVS), Heriberto García.
A conselleira lamentou que a medida recollida no plan de choque do Goberno central é "ineficaz" porque "se limita a 3 meses" e non aclara que pasa cos contratos anteriores e "co futuro". Ademais, engadiu, vólvese cargar o peso da medida "sobre os propietarios" e, apuntou, en Galicia non hai grandes propietarios de vivenda.
Anxos Vázquez tamén recalcou que o Executivo central crea "inseguridade xurídica" para propietarios e inquilinos, e tachou a medida anunciada de "oportunista". Tamén criticou que, ao ser "lineal" e non ter en conta os recursos de propietarios e inquilinos, "pouco ou nada pode solucionar".
A conselleira sinalou, con todo, que o goberno galego non quedará "de brazos cruzados" e afirmou que, coas ordes de axudas "sobre a mesa" pendentes de publicación, "vai ser moi difícil cumprir os prazos" dos fondos da UE, polo que urxiu unha reunión da Conferencia Sectorial de Vivenda "para que se prolonguen eses prazos tan restrinxidos, e que o sector (construción) non se vexa asfixiado, e as familias teñan un respiro".
SUBIDA DE MATERIAL "HISTÓRICA"
Pola súa banda, o presidente da Asociación de Construtores de Pontevedra, Miguel Ángel Caruncho, advertiu de que o incremento de prezos en material de construción é "histórico" e inédito nos últimos 50 anos, e lamentou que o Goberno central, co seu recurso, paralizase as medidas de equilibrio impulsadas pola Xunta e que supuñan un "balón de osíxeno" para o sector.
Con respecto ao plan de choque para paliar as consecuencias da guerra e ás medidas que afectan a esta actividade, Caruncho afirmou que o Real Decreto é "claramente mellorable", e apuntou que haberá que "reconducir" as obras en execución e, en canto ás novas, as administracións deberán "revisar á alza" os contratos polo aumento de prezos.
