Feijóo volve cargar contra Sánchez: "Que cumpra a súa palabra e baixe os impostos"

O presidente da Xunta e candidato a liderar o PP, Alberto Núñez Feijóo, reiterou as súas queixas de que os populares non coñecen o plan do Goberno central para facer fronte á alza de prezos, pero remarcou, en todo caso, que o xefe do Executivo central, Pedro Sánchez, debe "cumprir a súa palabra" e incorporar unha baixada de impostos.

En declaracións aos medios, Feijóo esgrimiu que "o primeiro", antes de emitir calquera valoración, sería coñecer o plan, algo que, dixo, aínda non se produciu. "Non sei se o Consello de Ministros, se todos os seus membros, teñen o texto, pero o resto de españois non temos o texto deste aparente plan para rebaixar a inflación que padece España nos últimos 12 meses", dixo.

"Se o Consello de Ministros aproba un texto e nolo remite, automaticamente faremos as propostas que correspondan. Somos un partido de Estado", engadiu, a continuación, antes de incidir en que a situación de España, desde un punto de vista económica, "é crítica".

Dita situación atribuíuna a que en España se chegou "tarde" a tratar de poñer coto "a todos os problemas", polo que agora o Estado "bordea do 8% de inflación e crecendo". "Este é o maior problema da economía española. E a ese maior problema, engádese a crise producida pola guerra, por esta orde", subliñou.

Non en balde, indicou que, baixo o seu punto de vista, falar dun "plan para paliar efectos da guerra de Ucraína xa é empezar mal" e agregou que as medidas deben encamiñarse a "paliar a inflación insoportable" que sofre a economía española, "o peor imposto ás clases baixas e ás rendas modestas". "Todo é máis caro", apostilou.

"CUMPRIR A SÚA PALABRA"

Máis aló, o presidente galego si lanzou unha advertencia: Sánchez "ten que cumprir a súa palabra". E lembrou que se comprometeu ante todos os presidentes autonómicos na Conferencia da Palma a que o plan contivese "unha baixada de impostos" para incidir no descenso da inflación. Se isto non ocorre, Feijóo deu por feito que a situación seguirá "empeorando", xa que os prezos continuarán á alza mentres "aumenta o gasto e o déficit".

Dito isto, apelou a ser "prudentes" e "crer" na palabra de Sánchez, plasmada, lembrou, nunha declaración consensuada na Palma. Pola súa banda, asegurou que confía nesta palabra e insistiu en baixar os impostos para frear unha alza de prezos que vai a un ritmo que non poderían "resistir" familias, pensionistas ou persoas emprendedoras.

RESPOSTA DE CALVIÑO

A vicepresidenta primeira do Goberno, Nadia Calviño, respondeu este mediodía a Feijóo que o Goberno si cumpre coa medida de baixar impostos acordada na Conferencia de Presidentes de hai unhas semanas. Neste sentido, argumentou que no Plan de choque para paliar as consecuencias da guerra de Ucraína prorrogáronse as baixadas do IVE e dos impostos específicos da electricidade na factura da luz.

Calviño precisou que "está moi claro" que o paquete de medidas "incorpora rebaixas de impostos". Na mesma liña, fontes de Moncloa defenderon que o Goberno español é o que máis baixou este tipo de tributos "da historia".

Deste xeito, o Executivo mantén a rebaixa de impostos no recibo da luz ata o 30 de xuño e que son: a redución do IVE ao 10%, do Imposto da Electricidade ao 0,5% e a suspensión do imposto do 7% á xeración eléctrica.

Ademais, Calviño engadiu que a rebaixa de 20 céntimos no prezo dos carburantes suporá un "impacto fiscal moi significativo" e que estimaron entre 10.000 e 12.000 millóns de euros se as medidas se prorrogasen todo o ano.