A UDC ofertará o próximo curso académico 3.336 prazas para novo alumnado e incorpora outros dous títulos

O Consello de Goberno da Universidade da Coruña (UDC) aprobou o límite de prazas para as titulacións de grao para o próximo ano académico. En concreto, ofrecerá 3.336 prazas de primeiro curso para o novo alumnado, 37 vacantes máis que o curso pasado, segundo informa o reitorado.

A UDC incrementa o número de postos o Grao en Relacións Laborais e Recursos Humanos que se imparte no centro adscrito da Coruña, en cinco máis, e os dous graos en Enfermaría, tanto no centro adscrito da Coruña como o da Facultade de Enfermaría e Podoloxía en seis prazas máis cada centro.

Haberá tamén dez vacantes máis para o Grao en Ciencia e Enxeñaría de Datos que se imparte na Facultade de Informática e finalmente, aumentan tamén as prazas, en dez, no Grao en Turismo, na modalidade presencial.

Así mesmo, incorpora para o próximo curso o Grao en Intelixencia Artificial (interuniversitario coas universidades de Santiago e Vigo), na Facultade de Informática, e o Grao en Relacións Internacionais (interuniversitario coa Universidade de Vigo), na Facultade de Humanidades e Documentación.

O Grao en Relacións Internacionais será multilingüe en inglés, polo que será necesario presentar certificado que acredite coñecemento indispensable deste idioma antes de efectuar a matrícula. Esta titulación, xunto coa de Xestión Industrial da Moda son os únicos graos en Galicia considerados como "bilingües".