A Deputación da Coruña facilita prazas no IES Rosalía Mera para 44 persoas refuxiadas
Por E.P. | SANTIAGO DE COMPOSTELA | 04/04/2022 | Actualizada ás 17:25
A Deputación da Coruña facilitará 44 prazas para persoas refuxiadas ucraínas no IES Rosalía Mera, para o que o organismo provincial acometeu obras de acondicionamento na residencia estudantil. Trátase de 22 habitacións dobres que poderán dar acollida a 44 persoas refuxiadas da guerra. Para iso, o organismo provincial púxose en contacto co Ministerio de Inclusión, Seguridade Social e Migracións para transmitirlle a dispoñibilidade deste equipamento.
Coincidindo coas obras realizadas, o presidente provincial, Valentín González Formoso, visitou o centro, acompañado das deputadas de Benestar Social e Educación, Ana Lamas e Sandra González, respectivamente. Tamén estivo a presidenta de Cruz Vermella na Coruña, Mercedes Casanova, xa que con esta entidade se formalizará un convenio para que se faga cargo da xestión temporal deste espazo de acollida. Sobre ela, o presidente provincial indicou que o obxectivo é facelo "de forma ordenada e en colaboración con Cruz Vermella e o Estado" de cara á chegada destas persoas refuxiadas de forma "inminente".
