Por Galicia Confidencial | Compostela | 15/06/2014 | Actualizada ás 10:27
A Garda Civil detivo esta noite en Ponferrada (León) a María Osorio López, condenada a sete anos, nove meses e un día de prisión por integración na organización Resistencia Galega.
Segundo informou o Ministerio do Interior, a moza, que se atopaba fuxida da xustiza, foi detida nun domicilio desta cidade. Sobre ela pesaba unha orde de ingreso en prisión tamén por falsificación de documento público con fins terroristas.
Osorio realizou unha videoconferencia pública o pasado 7 de xuño na que manifestou a súa intención de manterse na clandestinidade e de non presentarse no cárcere para cumprir a condena. Precisamente, esa aparición pública sería o detonante para a súa detención xa que as forzas de seguridade estaban xa sobre a súa pista.
A Audiencia Nacional condenou a María Osorio hai un ano, xunto a outro tres integrantes de Resistencia Galega, a penas de entre 10 e 18 anos de cárcere polos delitos de integración en banda terrorista, tenencia de explosivos e falsificación, todo iso no marco da primeira sentenza en tales termos ditada para membros desta organización.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.