Lalín, punto de partida da mostra 'Foi un home. Laxeiro en América'

A exposición recolle 30 pezas sobre a súa estancia en América e poderá verse máis adiante en Santiago de Compostela, Madrid e París.

Por E.P. | SANTIAGO DE COMPOSTELA | 06/04/2022 | Actualizada ás 20:21

Comparte esta noticia

O Museo Ramón María Aller de Lalín, lugar de nacemento do pintor galego Laxeiro, é o punto de partida da itinerancia da mostra principal que conmemora o 'Ano Laxeiro', que levará unha trintena de pezas do artista centradas nos seus anos en Buenos Aires.

Este mércores tivo lugar a inauguración da exposición, que visitará Madrid, Santiago e París despois de deixar a capital do Deza o 5 de xuño. O acto contou coa participación do conselleiro de Cultura, Román Rodríguez; o alcalde de Lalín, Xosé Crespo, e o presidente do Parlamento de Galicia, Miguel Ángel Santalices.

A mostra, titulada 'Foi un home. Laxeiro en América' recolle 30 pezas procedentes de coleccionistas persoais e diversas institucións centradas nas dúas décadas (1950-1970) nas que Laxeiro se instalou en Buenos Aires. "Foi a súa etapa de madurez cunha notable evolución formal na súa pintura, condicionada polo contacto cun mundo cosmopolita e co ambiente intelectual galego da capital arxentina", explicou durante a inauguración o experto Carlos L. Bernárdez.

DE LALÍN A PARÍS

No ano 2022, con motivo da homenaxe da Real Academia Galega de Belas Artes no Día das Artes Galegas na súa honra, articúlase a programación cultural especial do Ano Laxeiro, que incluirá, como unha das grandes apostas, a exposición itinerante 'Foi un home. Laxeiro en América (Bos Aires, 1951-1970)' comisariada por Carlos Bernárdez.

Poderase ver en Lalín, Santiago de Compostela, Madrid e París entre os meses de abril e decembro coa colaboración da Real Academia de Belas Artes de San Fernando e a Embaixada de España en Francia. Baixo o título dunha destacada obra de Laxeiro dos anos 70, a exposición -que se completará cun libro-catálogo- presentará unha nova mirada sobre a súa obra de madurez durante a súa longa estancia arxentina.

A esta mostra súmanse diferentes actividades como a celebración dun gran simposio en Santiago de Compostela no mes de xuño. O Centro Galego de Arte Contemporánea (CGAC) reunirá a referentes das artes plásticas e da investigación académica que abordarán a figura de Laxeiro e o seu contexto cultural e social.

A Xunta destacou que o Ano Laxeiro buscará promover o legado do artista entre a mocidade. Por iso, producirase material divulgativo e didáctico que estará dispoñible para os centros educativos galegos. Tamén haberá propostas no ámbito audiovisual, coa estrea do documento 'O meu veciño Laxeiro', que repasará o seu percorrido vital e artístico por Lalín, Vigo e o seu vínculo con Arxentina. Ademais, producirase unha peza musical específica, 'A fantasía musical Pintor Laxeiro' a cargo do compositor José Luís Represas, que elaborará unha melodía popular que se vincule con Laxeiro e o Concello de Lalín.

O Ano Laxeiro tamén contará coa creación dun espazo dixital para acceder aos traballos de Laxeiro e á programación específica a través da páxina de Cultura da Xunta de Galicia. Toda esta programación contará cunha imaxe específica da efeméride que será elaborada polo artista Antón Lamazares na honra de Laxeiro.

Con todas esta propostas a Xunta e o resto de entidades promoverán o legado do artista nado en Lalín en 1908. Desde os seus inicios, Laxeiro estivo influenciado polo mundo rural, onde naceu e pasou a súa infancia. Os seus traballos encádranse no grupo dos Renovadores, aínda que o relato de vida e as súas influencias fixeron que gozase dun estilo único. Despois de residir en diferentes cidades españolas, nos anos 50 recalou en Buenos Aires, onde fixou a súa residencia ata 1970. Ao seu regreso a Galicia sucedéronse as homenaxes e recoñecementos ata a súa morte en 1996.

Presentación da exposición sobre Laxeiro 'Foi un home'. JAVIER LIAÑO
Presentación da exposición sobre Laxeiro 'Foi un home'. JAVIER LIAÑO

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta