Feijóo xustifica un acordo con Vox porque o PSOE pacta con Podemos e apóiase en Bildu e ERC
"O manual de coalicións do PSOE é xusto o manual do que non se pode utilizar", asegura, a poucos días da investidura de Mañueco.
Por Europa Press / Redacción | | 08/04/2022 | Actualizada ás 13:28
O presidente do PP, Alberto Núñez Feijóo, considera unha "broma" que o PSOE lle pida non pactar con Vox en Castela e León cando goberna con Podemos en España e ten como socios a Bildu e ERC. É máis, subliñou que en Navarra os socialistas están a gobernar coa esquerda abertzale.
"Entendo que iso é unha broma. Que o PSOE nos diga 'aquí hai que romper con Vox', e o PSOE gobernando con Bildu en Navarra, con Podemos no Goberno de España, e cos apoios de ERC e Bildu para sacar orzamentos e leis. Supoño que o manual de coalicións do PSOE é xusto o manual do que non se pode utilizar", recalcou nunha entrevista na Cadea Ser, que recolleu Europa Press.
O debate de investidura de Alfonso Fernández Mañueco como presidente da Xunta de Castela e León, tras o acordo de Goberno asinado con Vox, terá lugar o luns 11 de abril, case dous meses despois das eleccións autonómicas do 13 de febreiro. A toma de posesión está prevista despois de Semana Santa, o 19 de abril.
"CONSEGUIR A REAGRUPACIÓN DO CENTRODEREITA"
Ao ser preguntado se haberá máis pactos do PP coa ultradereita como o de Castela e León, onde se celebra o luns o debate de investidura de Alfonso Fernández Mañueco, Feijóo indicou que o obxectivo do seu partido é "conseguir a reagrupación do centrodereita en España".
"O obxectivo é gañar as eleccións", proclamou, para deixar claro que el non aspira a ser unha partido "bisagra" para sumar con outras formacións poder chegar á Moncloa ofrecendo "inestabilidade política e económica" ao país.
