Sanidade ve "con preocupación" o número de contaxios e di que está "pendente das variantes"

O conselleiro de Sanidade, Julio García Comesaña, explicou este martes que en Galicia existe un "predominio cada vez máis alto" da variante BA2 de Ómicron, mentres que "aínda" non se detectaron casos da XE, considerada a máis contaxiosa ata a data.

Así o manifestou no marco dunha visita a Moraña, a preguntas dos medios sobre a situación da pandemia en Galicia, sobre o que admitiu que ve "con preocupación o que pasa en Galicia, España e o mundo". Tras apuntar que o sucedido na cidade chinesa Shanghái, confinada pola Covid-19, "parece que ten que ver coa variante Ómicron" coñecida e relacionada coa situación de aumento de contaxios no mes de xaneiro, a Xunta está "pendente das variantes".

Respecto diso, incidiu en que "non hai grandes novidades no seguimento das variantes", para explicar que en Galicia se secuencia "un número importante de mostras". "Sabemos o que está a circular. Estamos no patrón europeo, cun predominio cada vez máis alto da BA2, sen que haxa a denominada XE aínda en Galicia", afirmou.

Ademais, incidiu en que prosegue o proceso de vacinación, en especial de crianzas. "Seguimos vacinando de modo ininterrompido, ofertando a vacinación", indicou, a quen non a recibiu ata agora, porque a oportunidade "sempre está dispoñible".

"Ímonos achegando á convivencia normal co virus, que non á desaparición, que lamentablemente non se vai dar", indicou o titular de Sanidade, que puntualizou que en Galicia se seguen "monitorando os casos positivos", tanto os que están declarados oficialmente, "que están en número preocupantes", e dos autotest --aínda que non se declaran-- que a xente fai en casa. "Vemos que seguen aumentando", engadiu. "Temos que ir normalizando o comportamento xeral", dixo, pero "sempre" con especial vixilancia das persoas máis vulnerables.

INGRESOS

En especial, Comesaña referiuse aos datos de ingreso en Galicia para destacar que "máis da metade de ingresados" estano "con Covid e non por Covid".

Iso, para o conselleiro, permite "ter unha certa tranquilidade no que se refire ao volume de xente hospitalizada". No entanto, recoñeceu que, "aínda que sexa a metade, preocupa", polo que apelou a manter "a precaución e o sentidiño dos galegos" con medidas como a distancia de seguridade e, "cando un é positivo non acudir a sitios con concentración de xente", o que, matizou, "axudou ata agora" e que, concluíu, "siga axudando nesta situación de normalidade".

TRATAMENTO PAXLOVID

Por outra banda, preguntado polo tratamento co antiviral Paxlovid en Galicia, o conselleiro de Sanidade apuntou a "previsión de chegada en próximas semanas de máis fármacos". "Non detectamos grandes incidencias e é pronto para ver os resultados clínicos", afirmou en relación a tratamentos do antiviral Paxlovid contra a Covid-19 distribuídos a finais de marzo ás Comunidades Autónomas.

Un home recibe a terceira dose da vacina contra o Covid-19 | Fonte: Eduardo Parra - Europa Press.