Case 21.000 peregrinos realizaron o Camiño no que vai de ano, a cifra máis alta da historia do Xacobeo
Alfonso Rueda augura un ano "histórico" para o Camiño na presentación dun sistema de medición de peregrinos en Arzúa
Por E.P. | SANTIAGO DE COMPOSTELA | 14/04/2022 | Actualizada ás 16:31
O vicepresidente primeiro e conselleiro de Presidencia, Xustiza e Turismo, Alfonso Rueda, augurou un ano "histórico" para o Camiño de Santiago, dado que desde comezos de ano xa se superaron os 20.700 camiñantes, a cifra máis alta neste mesmo período en toda a historia do Camiño e do Xacobeo.
Rueda expresouse así este xoves en Arzúa, onde participou no albergue de Ribadiso na presentación dunha experiencia piloto para pór en marcha un sistema de medición do número real de peregrinos, complementario ás estatísticas de Compostelas seladas na Oficina de Acollida ao Peregrino.
Tal e como destacou o conselleiro de Turismo, este mércores seláronse 1.600 Compostelas, "o máximo diario de 2022". "Os números indican que xa levamos máis peregrinos que en 2019, o último ano normal, e tamén máis que en 2010, tamén Ano Santo. O ano pasado a estas alturas déronse 1.000", explicou, tras o que insistiu en que este pode ser un "ano marca".
Segundo explica a Xunta nun comunicado, superáronse os rexistros de xaneiro a mediados de abril tanto fronte ás máis de 18.600 Compostelas no ano marca de 2019 como ás máis de 19.100 do anterior Xacobeo 2010.
