Por Europa Press / Redacción | SANTIAGO DE COMPOSTELA | 18/04/2022 | Actualizada ás 13:25
A portavoz nacional do BNG, Ana Pontón, augurou que o cambio na Presidencia da Xunta, que previsiblemente asumirá o actual número dous, Alfonso Rueda, significará "continuísmo puro e duro" na xestión dun Goberno autonómico no que ve necesario un cambio "de políticas, non de caras".
Así o manifestou a preguntas dos medios nunha rolda de prensa celebrada este luns no Parlamento galego, onde a líder nacionalista dixo coñecer polos medios de comunicación as novidades sobre o proceso de substitución na Xunta coa saída do presidente desde 2009, Alberto Núñez Feijóo; pendente aínda de facerse efectiva.
"Levamos dúas sesións de control tentando que na sede da soberanía dos galegos, que é o Parlamento, se diga con claridade cal é o calendario que imos ter nos próximos días. E o que vemos é que se din máis cousas nos medios que ante o propio Parlamento", manifestou Pontón, que volveu urxir a adopción de decisións para sacar o Executivo galego da "parálise" na que, di, está sumido "desde hai tres meses".
"Dixemos desde o primeiro momento que se a decisión era presidir o PP tiña que dimitir como presidente da Xunta", incidiu, antes de lamentar que os populares prolonguen os tempos da substitución ata "cadrar o sudoku de poder das baronías" mentres Galicia atravesa "a peor" crise de prezos das últimas décadas.
GALICIA, "A MENOS"
Para a líder nacionalista, a chegada de Rueda á Xunta non suporá cambios de calado. "Imos ter continuismo puro e duro", espetou, antes de sentenciar que Galicia "vai a menos" co PP á fronte do seu goberno, no que se necesitan cambios "de políticas, non de caras".
"O único que creceu nestes anos co PP foi a débeda, a emigración e os recortes en sanidade", aseverou Pontón, que a súa formación representa a "alternativa de futuro" e que se envorcarán "con todo o compromiso e o talento" para alcanzar San Caetano. Cuestionada sobre se cre que a saída de Feijóo achandará ese camiño, Pontón incidiu en que "en política non hai que subestimar a ninguén".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.