Diego Calvo apela á unidade no PPdeG: "Sairemos ben do congreso"
O presidente do PP da Coruña asegura que son "un partido serio" e non traerán "problemas novos".
- Feijóo avisa ao seu sucesor: debe "manter o legado do PPdeG" e "non abandonar o galeguismo integrador"
- Feijóo ratifica o calendario sucesorio para maio: primeiro relevo na Xunta e logo no PPdeG
- O congreso do PP galego para a sucesión de Feijóo xa ten data: o 21 e 22 de maio
Por E.P. | A CORUÑA | 19/04/2022 | Actualizada ás 10:36
O presidente provincial do PP da Coruña, Diego Calvo, apelou á "unidade" no partido tras anunciarse o luns que os populares galegos celebrarán o congreso de sucesión de Feijóo os días 21 e 22 de maio en Pontevedra.
Así o manifestou, a preguntas dos xornalistas, coincidindo coa súa presenza nun acto da Asociación Provincial de Empresarios da Construción da Coruña (Apecco) e ao ser cuestionado sobre o congreso e a figura do vicepresidente primeiro Alfonso Rueda como substitución de Feijóo.
Diego Calvo insistiu en que, ante a "necesidade" de facer "un cambio en Galicia" polo nomeamento de Feijóo como presidente do PP, se puxeron "ao choio", unha vez celebrado o congreso a nivel estatal.
Por outra banda, defendeu que o obxectivo foi "non causar máis problemas aos galegos". "Somos un partido serio e o fundamental é arranxar os problemas que ten a xente e non traer problemas novos". Por iso, mostrouse convencido de que o congreso que celebrará o PPdeG en maio será "excepcional" e haberá "unidade", a mesma que, segundo expuxo, "os caracterizou" estes anos. "Sairemos ben do congreso e sairá ben Galicia", sentenciou.
