A oposición no Concello da Coruña esixe explicacións sobre o retorno económico de partido España-Islandia

Un informe do goberno local da Coruña cifra en 13,1 millóns o retorno do partido España-Islandia, segundo explica o BNG tras a reunión da comisión de deportes. Tanto a formación nacionalista como Marea Atlántica e o PP cuestionan o gasto e esixen explicacións.

Os populares aseguran que, segundo o trasladado na reunión, "hai un compromiso para devolver á partida de torneos deportivos coa que se pagaron os máis de 400.000 euros de custo do partido amigable da selección española", pero engaden que non se sabe "cando se executará o retorno dun diñeiro que supón a metade da partida para organizar eventos deportivos na nosa cidade".

Pola súa banda, a Marea Atlántica sostén que o partido da selección española "consumiu nun só día o 41,3% dos fondos previstos para organizar eventos deportivos este ano".

"O único que presentou o goberno para xustificar estas cifras foi un doumento dunha páxina encargado pola Alcaldía e completamente falto de rigor", indica sobre o impacto publicitario. Mentres, esixe "explicacións serias".

Pola súa banda, o BNG ve o informe "feito a medida". "Cifra o retorno en 13,1 millóns, pero podería cifralo en cinco ou en 50", sinala ao cuestionar o seu contido que non ve "serio". Para o seu portavoz municipal, Francisco Jorquera, "os 429.000 euros gastados neste partido son un investimento totalmente prescindible tendo en conta que vai en detrimento de atender as necesidades do deporte coruñés".