Evacúan tres persoas en Ferrol por resultaren intoxicadas debido á mala combustión dunha caldeira
Os profesionais de Urxencias Sanitarias 061, ademais de atender aos ocupantes da casa, comprobaron que había gas na estancia.
Por E.P. | SANTIAGO DE COMPOSTELA | 19/04/2022 | Actualizada ás 20:15
Tres membros dunha familia foron evacuados a un centro hospitalario de Ferrol tras resultar intoxicadas por monóxido de carbono debido á mala combustión dunha caldeira.
Segundo informou o CIAE 112 Galicia, a filla da familia foi quen deu a voz de aviso a través dunha chamada telefónica á central de emerxencias ao redor das 14,30 horas deste martes. Nela, pedía axuda para a súa nai, que estaba tendida sobre o chan.
Acto seguido, os efectivos de emerxencias da cidade desprazáronse á vivenda, situada na rúa do Mosteiro de Monfero. Alí, os profesionais de Urxencias Sanitarias 061, ademais de atender aos ocupantes da casa, comprobaron que había gas na estancia.
Realizadas as medicións, os bombeiros determinaron que a orixe da fuga estaba no mal funcionamento dunha caldeira.
