Solidariedade galega con Ucraína

Gadis e a súa clientela recadaron 125.000 euros na campaña de axuda a Ucraína que a cadea de supermercados puxo en marcha en colaboración con Unicef, segundo informa o grupo de distribución alimentaria.

A Axencia de Nacións Unidas para a Infancia será a encargada de xestionar esta achega que, fundamentalmente, irá destinada a facilitar o acceso a auga potable, medicamentos, equipos médicos, kits de hixiene e apoio psicosocial á infancia máis vulnerable. Coa cantidade económica recadada Unicef pode facilitar auga potable a 328.498 nenos e nenas.

"Grazas aos nosos clientes por demostrar, unha vez máis, a súa gran xenerosidade e sensibilidade. Entre todos, achegamos o noso gran de area para tratar de paliar unha situación de emerxencia, e non sería posible sen o seu apoio", sostén Melisa Pagliaro Fernández, directora de Mercadotecnia e RSC de Gadisa retail.

ABANCA

Abanca e Afundación tamén fixeron unha primeira entrega a Cruz Vermella e Save the Children en apoio a Ucraína, por importe de 271.487 euros, grazas ás doazóns realizadas por empregados, clientes e outras persoas interesadas en colaborar. Esta campaña solidaria, que comezou o pasado 3 de marzo, recada fondos a través da conta IBAN80 2080 7208 3385 3000 7122, que segue operativa para aqueles que desexen facer achegas.

O director xeral de Responsabilidade Social, Sustentabilidade e Comunicación de Abanca e presidente de Afundación, Miguel Ángel Escotet, foi o encargado de asinar os acordos de colaboración con Cruz Vermella e Save the Children, que destinarán o importe recibido a diferentes proxectos que están a desenvolver ou van desenvolver a curto prazo para atender as necesidades máis urxentes da poboación afectada pola crise humanitaria, con especial atención á infancia.

Máis aló desta cuestión, o banco e a súa Obra Social colaboran estreitamente desde o inicio da crise coa asociación AGA-Ucraína, a quen cederon unha nave no Polígono de Pocomaco, na Coruña, que se habilitou para o seu uso como centro de operacións e almacén de doazóns. O tres organizacións fretaron conxuntamente catro transportes de axuda humanitaria que conseguiron levar desde A Coruña, Santiago, Ourense e León ata a zona de conflito 92 toneladas de material de primeira necesidade, como medicamentos, roupa de abrigo, alimentos ou produtos de hixiene.

Igualmente, facilítase a AGA-Ucraína apoio na organización do voluntariado e na recepción de refuxiados, de forma que se ofrece un espazo apropiado no caso de ser necesario para acoller no país ás persoas que foxen da guerra. Ademais, a entidade financeira estableceu a gratuidade de todas as transferencias que se realicen a Ucraína desde as contas de Abanca.

CONCELLO DA CORUÑA

O Concello da Coruña, a través da Concellaría de Igualdade, Benestar Social e Participación, puxo en marcha un programa educativo de clases de español para persoas ucraínas de acollida.

Trátase de tres cursos de clases de español (dous para menores e outro para persoas adultas) que teñen como finalidade promover a integración social das persoas acollidas na cidade.

A concelleira de Igualdade, Benestar Social e Participación, Yoya Neira, sinalou que "o descoñecemento do idioma supón unha gran barreira á hora de conseguir unha total integración social". Por iso, segundo informa, o Concello da Coruña impulsa esta formación en competencias lingüísticas, con dous cursos de clases de español que se impartirán desde o 21 de abril ata o 31 de agosto.

GALA EN OURENSE

Catorce artistas galegos forman parte do cartel da gala 'SOS Ucraína', que terá lugar no auditorio de Ourense o próximo 29 de abril a partir das 20,30 horas.

O evento, no que haberá animación e tamén photocall, está organizado polos colectivos Nós, Xente do redor e Cova da Meiga e foi presentado este xoves no Liceo de Ourense.

A entrada solidaria e a fila cero, que se destinará integramente a Cruz Vermella é de 12 euros.

Con todo, non é a única actuación musical na provincia para axudar aos refuxiados ucraínos. No Concello de Carballiño, a propia institución municipal, Cruz Vermella e o establecemento 'Cacho pizza', que celebra o seu 30 aniversario, organizan unha xornada solidaria o próximo 5 de maio.