Por Europa Press / Redacción | Pontevedra | 22/04/2022 | Actualizada ás 15:41
A presidenta da Deputación de Pontevedra, Carmela Silva, aproveitou este venres a súa comparecencia ante a prensa para compartir a súa "sorpresa" ante determinadas novas ocorridas nos últimos días e lanzar unha contundente mensaxe de "alerta ás mulleres". "Vox e o PP son o mesmo, cren que as mulleres non temos dereitos, que temos que seguir sendo segundoxénitas", sentenza.
A presidenta da Deputación de Pontevedra fixo referencia á cualificación de "hembrista" que utilizou o portavoz do Grupo Parlamentario de Vox no Congreso dos Deputados, Iván Espinosa de los Monteros, para referirse ao goberno provincial pontevedrés.
O portavoz de Vox publicou unha mensaxe en Twitter como reacción a outro da Deputación de Pontevedra que dentro da campaña #365Dias365Mulleres reivindica cada día nas redes sociais a figura dunha muller, o 17 de abril foi a empresaria María Espinosa de los Monteros como unha "destacada activista polos dereitos civís e políticos da muller a comezos do século XX".
En referencia a este chío, a mensaxe do político de ultradereita dicía: "Encántame cando as hembristas descobren quen foi a primeira feminista de España", tentando que se relacionase o seu apelido co da citada activista e dando a entender que se trata dunha antepasada súa cando iso non é certo.
Carmela Silva comentou que "a xente de Vox ademais de ser machistas, de ser racistas, de ser homófobos, de ser fascistas... son incultos". Lembra que María Espinosa de los Monteros "nada ten que ver" co portavoz parlamentario de Vox.
"Realmente, esta muller volvería morrer se fose familiar deste machista, misóxino e señor bastante inculto" afirmou a mandataria socialista sobre esta "barbaridade" do político de ultradereita.
"Se ser hembrista é defender as mulleres, a presidenta da Deputación está encantada de que Vox a ataque", afirmou Silva.
CRÍTICAS A FEIJÓO
Nesta mesma comparecencia de prensa, a presidenta da Deputación tamén fixo referencia a Alberto Núñez Feijóo, "ese señor que debería deixar xa a Xunta de Galicia porque agora vai presidir o Partido Popular".
Carmela Silva criticou que ao presidente da Xunta "lle parece ben que en Castela León haxa un goberno con nove conselleiros e só tres mulleres conselleiras". Censura que esa falta de paridade "nos lugares onde se toman as decisións" é algo "terrible e realmente duro".
"Desde logo, defensor da igualdade nin foi, nin é, nin será", asegurou a presidenta da Deputación de Pontevedra sobre o líder do Partido Popular, ao que tamén criticou polo seu modo de facer política "no que o único que importa é facer propaganda". Tacha de "vergoña" que os populares gobernen coa ultradereita.
Carmela Silva tamén comentou que acaba de regresar de Colombia, onde acudiu a visitar o seu fillo e o seu neto. Nesa viaxe aprendeu que "temos que salvagardar o Estado de benestar", ademais da socialdemocracia, os valores democráticos de cohesión social, "que soamente é posible mantelos con impostos", apuntou.
Neste sentido, Silva instou a Alberto Núñez Feijóo a que "deixe de pedir que baixen os impostos e pida que paguen máis impostos os que máis teñen, esa é a solución para preservar este modo de vida que temos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.