Xunta e o Goberno central colaborarán pola sustentabilidade agropecuaria na Limia

A Xunta e o Goberno central avanzan na súa colaboración para impulsar a sustentabilidade da actividade agropecuaria na comarca da Limia. Segundo sinalou a Consellería do Medio Rural, este martes o conselleiro José González mantivo unha reunión por videoconferencia co secretario xeral de Agricultura e Alimentación do Ministerio, Fernando Miranda.

Durante o encontro, ambos valoraron os progresos rexistrados no proxecto de limpeza das canles de regadío e dos camiños paralelos da comarca ourensá, uns avances que, aseguran, permitirán iniciar en breve a súa tramitación.

Neste sentido, o secretario xeral lembrou que a iniciativa ten a consideración de proxecto de interese xeral, conforme á lei de acompañamento dos orzamentos xerais do Estado de 2022, o que supón darlle prioridade por parte do Ministerio.

Así mesmo, infórmase de que estas actuacións teñen un orzamento de 16 millóns de euros e centraranse en asegurar a drenaxe e o correcto funcionamento do sistema hídrico da comarca, algo "esencial" para garantir "a sustentabilidade da súa actividade agropecuaria".