Que din os rumorosos?
X.L. MÉNDEZ FERRÍN Diciamos na pasada Segunda Feira que a X.C. Caneiro, meu amigo e brillante novelista, a letra do Himno Galego lle parece de baixa calidade poética en canto que Bieito Iglesias, non menos aprezado e excelente autor, encontra dita letra ben porque só poden comprender o seu significado os especialistas en literatura simbolista.
Como é consabido a letra do Himno está tomada do poema que Eduardo Pondal titulou Os Pinos. Poema que podería situarse historicamente na sensibilidade literaria máis innovadora da segunda metade do século XIX. En termos de literatura comparada limita, non con calquera dos patetismos contemporáneos da Península Ibérica, senón co clasicismo das Ode Barbare (1877) de Giosuè Carducci ou cos Poèmes Barbares (1862) de Leconte de Lisle, como xa indicara Otero. Co italiano, garibaldino e tricolore, teñen en común Pondal e Os Pinos a vontade de intervención nacional-popular unida ao purismo perfeccionista. Vaguedade, incluso autoproclamada, fusión coa natureza, atemporalidade, enunciación modulada en espacios referenciais de caracter suprarreal, son notas que, postos a escribir á presa, caracterizan, na onda do parnasianista francés, Os Pinos. Poema este que, ao contrario do que Caneiro opina, eu reputo belísimo alén de nacionalista como corresponde ao xénero e á situación colonial do contexto dentro da que funciona.
Carto, o poema iníciase cunha longa pregunta que a voz autorial lle fai aos pinos ("os rumorosos", emblema nacional no discurso do Bardo) para que eles declaren os contidos do seu diálogo co resplendor luar. O resto do poema é vindicativo e convoca á abolición da Colonia e á instauración da Nazón de Breogán, que hogano se encontra sumida no soño da servidume. A partir de aí, a despeito do que pensa Bieito Iglesias, sucédense unha serie de clarísimos signos de adversidade (Seamus Heaney, irlandés) que a voa dos rumorosos chama a superar mediante o combate heroico. Todo se fai comprensíbel e todo o mundo, salvando os férridos (lectura de Ferreiro) e duros e mailos imbéciles e os escuros, entenden o que Os Pinos queren decer, incluída a serie nazón, eidos, fogar, grei, armas de Breogán. Tanto se comprende a letra do Himno que o número de persoas chamadas Breogán non deixa de crecer na Nazón Incesante. E logo están as nais galegas que instruirán os fillos para o combate- ao modo espartano.
E a Lusitania espera o abrazo estratéxico dos galegos. A loita será dura e culminará en victoria. Ditas coas miñas pobres palabras, as nocións fanse politicamente convencionais. Coas verbas pondalianas, na liña de Carducci risorgente e na dun Leconte de Lisle que fora furierista e radical, a voz poética vaticina aluarada e as palabras levitan nunha atmósfera de mito futurista e potencia conminativa que pode facer estremecer unha multitude se, naturalmente, está constituída de subxectividades con conciencia de subalternidade e de dependencia colectiva. Tamén me semella normal que aqueles que descoñezan a pulsión de Libertade non acaben de entender que é o que diaño están sempre a decer os rumorosos.
http://www.farodevigo.es/secciones/...