Por Europa Press / Redacción | SANTIAGO DE COMPOSTELA | 28/04/2022 | Actualizada ás 13:43
A federación de ensino do sindicato CIG acusou á Consellería de Educación de "discriminar" aos nenos de educación infantil polos seus criterios na dotación de prazas de orientación que, din, prexudica a determinados centros e zonas xeográficas de Galicia.
Nun comunicado remitido aos medios este xoves, a central nacionalista critica os cambios introducidos pola Administración autonómica para a repartición de prazas de orientación en escolas e colexios de Galicia.
A CIG considera que todos os centros con seis ou máis unidades deberían contar cun servizo de orientación. Piden que para medir este baremo se contabilicen as unidades de infantil.
Así, denuncia que as escolas de educación infantil "son unha das tipoloxías de centros máis prexudicadas pola decisión da administración educativa de non pór ao mesmo nivel as aulas de infantil que as de primaria".
Como propostas, a CIG pide á consellería a modificación da rede de orientación para que computen as aulas de infantil, dotar "de carácter inmediato" ás EEI de seis ou máis unidades dun departamento de orientación e que se negocie cos sindicatos "calquera modificación dos catálogos dos postos de traballo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.