A empresa propietaria do camión de bombonas accidentado na AP-9 procedeu á limpeza do autoestrada

A empresa responsable da carga dun camión con bombonas accidentado este venres na autoestrada AP-9 ao seu paso polo municipio de Cambre procedeu á retirada, recollida, traslado e tratamento das bombonas de gas que resultaron danadas por causa do sinistro do vehículo que as transportaba.

Segundo informou o 112, este sinistro implicou que a Xunta activara o Plan de Protección Civil por accidentes con vehículos de transportes especiais, Transgal, co fin de "controlar e xestionar" o derrame da carga do camión que se accidentou pouco antes das 9,00 horas no punto quilométrico 12 da AP-9, en sentido Coruña.

Debido a esta situación e a perda da carga, bombonas de diferentes gases, entre eles, acetileno, os axentes da Garda Civil de Tráfico e da Policía Local procederon a interromper a circulación nun dos carrís en sentido á cidade herculina e a estudar posibles alternativas.

Pola súa banda, os Bombeiros de Betanzos instalaron dúas vías de refrixeración para manter a temperatura necesaria dos colectores de acetileno e evitar desta maneira riscos. O resto das bombonas con perdas conteñen osíxeno, argón e nitróxeno, que, ao estar ao aire libre, non representan perigo ningún para a poboación, destaca o 112.

Para estas tarefas, os efectivos do parque comarcal contan co apoio e colaboración dos efectivos do servizo local de Protección Civil e tamén do persoal da autoestrada. Con estas medidas, os equipos de emerxencias manteñen a situación controlada ata a completa e segura retirada dos colectores.

AVISOS

Este operativo configurouse despois de recibir o 112 Galicia as chamadas de alerta de condutores e vecinanza, que observaron como o camión cargado de bombonas perdía parte da carga por mor dun accidente. Así mesmo, apreciaron certo cheiro a gas, o que lles fixo sospeitar dunha fuga.

Con esta información, os xestores do Centro Integrado de Atención ás Emerxencias puxeron en marcha todos os protocolos de actuación sobre a emerxencia, mentres que os técnicos da Dirección Xeral de Emerxencias e Interior activaban o Plan Transgal para a protección das persoas.