Campaña da Deputación de Pontevedra para non quedar en casa e promover hábitos saudables
"Animamos a xente a abandonar hábitos nocivos e a ocupar o espazo público gozando dos recursos da provincia. Animamos á xente a non quedar en casa e a recuperar a normalidade", insistiu a presidenta da institución, Carmela Silva.
Por E.P. | SANTIAGO DE COMPOSTELA | 29/04/2022 | Actualizada ás 17:21
A presidenta da Deputación de Pontevedra, Carmela Silva, presentou este venres a campaña 'Na casa non quedo', para animar a toda a poboación da provincia a porse ao lado dos hábitos de vida saudables.
Segundo explicou Silva en rolda de prensa, a administración provincial distribuirá 4.500 camisetas e chalecos rotulados con esa lema que se comezarán a repartir entre as persoas participantes en distintas actividades ao aire libre organizadas pola Deputación nos ámbitos do deporte, do medio ambiente, da cultura e da convivencia.
Unha vez eliminadas as restricións orixinadas pola pandemia, esta iniciativa pretende "facer un chamamento para que a xente salga dos seus fogares, goce do aire libre e realice actividades", explicou a presidenta, quen animou "á cidadanía a que coñeza a provincia con alegría".
"Animamos a xente a abandonar hábitos nocivos e a ocupar o espazo público gozando dos recursos da provincia. Animamos á xente a non quedar en casa e a recuperar a normalidade", insistiu Silva.
Os primeiros chalecos reflectores, "que tamén inciden na seguridade" ao facer máis visibles ás persoas que os porten cando realizan actividades nocturnas, serán distribuídos nas 'Depoandainas' (800), 'DepoRutas BTT' (600), 'Depo Orienta' (600) e 'Depo Auga' (180).
As camisetas chegarán nun primeiro momento ás persoas que participen nos 'Bosques Terapéuticos' (700), nas 'Rutas Literarias' e nas de 'Arquitectura' (350) e nas rutas ornitolóxicas de 'Voando nas Rías Baixas' (100). Posteriormente, iranse ampliando a outras actividades.
