Xulgan o traballador de Ence acusado de patear o coche do alcalde de Pontevedra
A vista terá lugar o vindeiro xoves día 5 na Audiencia de Pontevedra. Enfronta un ano de cárcere.
Por Europa Press / Redacción | Pontevedra | 29/04/2022 | Actualizada ás 19:05
O vindeiro xoves 5 de maio terá lugar o xuízo contra o traballador de Ence acusado de patear o coche do alcalde de Pontevedra, Miguel Anxo Fernández Lores, durante unhas protestas de sindicalistas de Comisións Obreiras que entraron na sede do Concello en marzo do pasado ano.
O Ministerio Público solicita para o acusado un ano de prisión e unha multa de 1.470 euros por un delito de atentado á autoridade. A vista xudicial está sinalada para a mañá do próximo xoves na sección cuarta da Audiencia Provincial de Pontevedra.
Os feitos tiveron lugar o 11 de marzo de 2021, cando un grupo de 13 traballadores da pasteira asociados ao sindicato Comisións Obreiras entrou no edificio municipal de Pontevedra, situado na rúa Michelena.
Fiscalía recolle no seu escrito de acusación que, ao redor das 14,30 horas, o procesado "tentou abalanzarse" sobre o tenente de alcalde de Pontevedra, Tino Fernández, que abandonaba xunto ao rexedor as dependencias municipais, onde os sindicalistas se pecharon en protesta pola postura do goberno local no conflito pola localización da pasteira en Lourizán.
Este intento, continúa o Ministerio Público, foi impedido polos axentes policiais que custodiaban a saída dos membros do executivo local, que realizaron un cordón para permitir que os mandatarios alcazasen o aparcadoiro, onde volveron articular un dispositivo para tratar de abrir paso aos vehículos.
Alí, os traballadores taponaron a saída do aparcadoiro mentres proferían "insultos" e "berros" contra o alcalde, cuxo coche foi pateado dúas veces polo procesado, quen, segundo Fiscalía, chegou a dirixir a Lores graves descualificacións como "fillo de puta" e "me cago na túa puta nai".
Así, o Ministerio Público incide en que o acusado "tiña pleno coñecemento de que as persoas que saían do Concello eran o alcalde e concelleiros e que a persoa que conducía o vehículo ao que deu patadas era do alcalde", polo que inciden en que realizou estes actos "desprezando o principio de autoridade".
