Delgado Gurriarán, un home "vinculado á súa terra" que "puxo a poesía ao servizo da causa"
Este escritor, fortemente comprometido coa causa galeguista na diáspora, é o homenaxeado deste ano nas Letras Galegas.
Por Europa Press / Redacción | SANTIAGO DE COMPOSTELA | 01/05/2022 | Actualizada ás 11:50
A poesía de Florencio Delgado Gurriarán, autor homenaxeado este ano nas Letras Galegas, foi Valdeorras, a súa Córgomo natal, conexión coa natureza e 'saudade' pola súa terra galega desde o exilio, onde se converteu nun escritor fortemente comprometido coa causa galeguista na diáspora.
Tras a súa etapa de infancia, e despois de residir noutros puntos de España, Delgado Gurriarán só viviu en Valdeorras, no interior ourensán, desde 1928 e ata o estalido da Guerra Civil, tras o que a súa implicación co Partido Galeguista o fixo marchar ao exilio. Despois diso, unicamente regresou tres veces a Galicia, a última en 1981, tal e como lembra a Real Academia Galega.
Con todo, a súa voz poética e a súa acción cultural sempre estivo vinculada á terra que o viu nacer e ao compromiso co galeguismo. "Foi o poeta da paisaxe, de Valdeorras, cunha poesía que ten un vínculo importante coa terra", destaca, sobre a súa figura, a presidenta do Consello da Cultura Galega, Rosario Álvarez, para quen o seu papel cobra forza, xa no exilio, no marco do "activismo cultural".
"El, como poeta, naquela situación tan dramática de Guerra Civil e de exilio forzado, de reconstruír a súa vida e os seus vínculos coa terra alén do mar, opta por poñer a poesía ao servizo da causa", destaca Rosario Álvarez nunha entrevista a Europa Press, na que recoñece que, probablemente, o autor non pensara "uns anos atrás" nesa posibilidade.
ACTIVISTA CULTURAL
Para dedicarlle este ano as Letras Galegas, en Delgado Gurriarán "xúntanse dous perfís", apunta Rosario Álvarez, o de poeta en lingua galega, que "percorreu toda a súa vida", e o de "activista cultural" e "home comprometido coa cultura e con Galicia no seu conxunto desde o exilio".
Este segundo aspecto, indica a presidenta do CCG, pesou "moito" á hora de elixilo como homenaxeado. "Exíliase en México e, desde alí, desenvolve de maneira continuada no tempo un traballo como intelectual comprometido. Segue sendo alguén especial dentro da cultura galega e, ao mesmo tempo, encárgase de promover, de actuar como activista cultura, dentro do galeguismo", destaca.
En todo este proceso, Delgado Gurriarán mantería o contacto coa "Galicia interior" e, especialmente, coa súa terra natal. De feito, destaca Rosario Álvarez, Valdeorras é "un compoñente moi importante nesa poesía que ten un vínculo especial coa terra, coa paisaxe, no que el naceu".
Para o lector actual, Rosario Álvarez incide na emotividade dos seus poemas, tanto aqueles que compón en Galicia, "na inmediatez da paisaxe", como os que produce desde "fóra", onde "fala da súa terra e tamén da 'Galicia infinda'". "El emociónase igualmente con esa paisaxe que lle fala", apunta.
Ademais dos seus traballos propios, no exilio apoia, recolle e impulsa obra allea en prol da "causa galeguista". Deles, o Consello da Cultura Galega editará este ano, como homenaxe, o 'Cancioneiro da Loita Galega', unha obra de marcado carácter reivindicativo na que Delgado Gurriarán actuou como recopilador e editor, ademais de como poeta ocasional.
