Por Europa Press / Redacción | VIGO | 02/05/2022 | Actualizada ás 17:43
O conselleiro de Sanidade, Julio García Comesaña, destacou este luns na súa visita á unidade de saúde mental de Ponteareas que co persoal de psiquiatría, psicoloxía e enfermaría especialista que se incorporou ao devandito municipio, a Xunta contratou xa 117 novos profesionais de saúde mental desde que puxo en marcha o Plan de Saúde Mental a mediados de 2020.
Tal como subliñou o titular de Sanidade, desde comezos de abril xa está en funcionamento o equipo multidisciplinar de atención á saúde mental neste centro de saúde, para dar atención a toda a poboación adulta das comarcas do Condado e A Paradanta. Trátase da cuarta unidade de saúde mental ambulatoria para adultos que a Xunta puxo en marca desde mediados de 2020, tras as de Tui, Ordes e Oleiros.
Tal como explicou o conselleiro, os 117 novos profesionais contratados están nas unidades de saúde mental para adultos, nas novas unidades de prevención do suicidio, nas dúas unidades de saúde mental infanto-xuvenil postas en marcha, nos tres hospitais de día infanto-xuvenil que xa están a funcionar, no reforzo dos programas de saúde mental en hospitalización a domicilio ou sociosanitarios ou nos programas de psicoloxía de ligazón en primaria e hospital.
O obxectivo do Executivo galego é superar os 240 contratos en 2024, polo que o Goberno galego construirá unha nova unidade de hospitalización de saúde mental infanto-xuvenil de agudos dentro do hospital Álvaro Cunqueiro de Vigo, entre outras iniciativas.
MEDICINA FAMILIAR
García Comesaña puxo o foco tamén en que a Xunta publicou recentemente a convocatoria de 106 prazas para a especialidade de medicina familiar e comunitaria, co obxectivo de paliar o déficit na atención primaria. Nela poderán participar os MIR que están no último ano de formación.
Ademais, o Executivo galego considera "fundamental" a renovación das infraestruturas sanitarias, polo que unha das súas actuacións será precisamente a construción dun novo centro de saúde en Ponteareas, que superará os 5.000 metros cadrados, un 80% máis que o actual. Neste sentido, o persoal técnico de Sanidade xa visitou e avaliou as parcelas que se propuxeron para situar este novo edificio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.