Por E.P. | PONTEVEDRA | 02/05/2022 | Actualizada ás 18:37
O responsable de Economía da Deputación de Pontevedra, Carlos López Font, mantivo este luns unha reunión coa Federación Provincial de Cofrarías e reclamou á Xunta un "plan propio" e "inmediato" con axudas directas que mitigue o impacto da subida dos combustibles no sector pesqueiro.
López Font acudiu a este encontro co presidente das confrarías provinciais, José Manuel Rosas, tras a cal lle mostrou o apoio do goberno provincial para que "todos e todas, e con toda a forza da razón, chamen á porta á que hai que chamar".
Durante a conversación, segundo informa a Deputación, o deputado de Economía lembrou que a Xunta ten atribuídas "competencias exclusivas" sobre a pesca, a agroganadería e o transporte en virtude do Estatuto de Autonomía e que por iso recibe fondos estatais e europeos. Ademais, cifrou en 2.500 millóns anuais os fondos que o Goberno autonómico recada polos impostos sobre a enerxía.
"Hai que ser esixentes coa Xunta, que é a administración á que lle corresponde, como competencia propia, dar cobertura ao sector do mar nunha situación difícil, e que, ademais recadará este ano máis impostos dese gasoil á alza que está a causar o problema", insistiu López Font.
Neste contexto, destacou que o Goberno de España aprobou un plan anticrise de 430 millóns de euros para a pesca, a agroganadería e o transporte, ademais da bonificación de 20 céntimos sobre os carburantes, e aproveitou para cargar contra os partidos que votaron en contra "poñéndoo en risco".
"A Xunta de Galicia non pode seguir así. Debe articular un plan propio de modo inmediato e pór fin a este exercicio de escapismo", demandou o responsable provincial de Economía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.