Por Galicia Confidencial | Compostela | 03/05/2022 | Actualizada ás 22:00
Galicia camiña cara un novo periodo político co Partido Popular. Será co mesmo partido e a mesma xente, pero cunha faciana diferente. A sucesión no PP e na Xunta xa está encamiñada desde hai tempo, pero o futuro presidente galego, Alfonso Rueda, leva días tentando pechar a engranaxe do seu futuro goberno e partido. Unha engranaxe que pasa polo poder que nel terán os distintos "baróns".
Rueda leva días inistindo en que o seu modelo é como o de Feijóo e que, a pesar da rapidez dos cambios no PPdeG e na Xunta, a transición estase facendo de xeito "tranquila" e baixo a premisa da "unidade". "Había que dar exemplo de unidade e estámolo dando", sinalou este mesmo martes nun encontro que mantivo en Vilagarcía de Arousa cos cargos e militantes populares da comarca do Salnés.
E alí, como xa fixo na Coruña un día antes, volveu insistir en que o seu partido non é o dos "baróns". "Non hai un PP da Coruña, outro de Lugo, outro de Ourense e outro de Pontevedra. Hai un PP de Galicia", manifestou. "Se estamos unidos, seremos estables. E se somos estables, estaremos en condicións de asumir os retos que se nos presentan". Entre os que destacou dous: as eleccións municipais do 2023 e, un ano despois, "lograr en Galicia a quinta maioría absoluta".
OS TERRITORIOS E AS "NECESIDADES ESPECÍFICAS"
Con todo, e a pesar de repetilu en cada acto ao que acode, o certo é que Rueda é consciente de que non sería o novo líder do partido se non tivera chegado a un acordo cos pesos pesados do PPdeG. "Por suposto que cada territorio ten as súas necesidades específicas", dixo este martes, pero o proxecto do Partido Popular en Galicia "é un proxecto global". Unha chiscadela aos "baróns" que, xa no inicio de todo o proceso sucesorio, comezando por José Manuel Baltar e Diego Calvo, e rematando por Elena Candia, tamén pediron estar representados nese novo PP de Rueda.
E parte deses compromisos adquiridos para "pacificar" o partido foron en forma de concesións e pactos. E, entre elEs, está que o presidente do PP da Coruña entre na Xunta como conselleiro. Este mesmo martes volvía a insistir EN que agarda que Diego Calvo estea no seu futuro goberno. "Espero que acepten formar parte do meu goberno", dicía tamén en relación ao vicepresidente segundo, Francisco Conde.
O DILEMA "PACO CONDE"
De feito, algunhas fontes consultadas apuntan que Conde podería ir tamén a Madrid como asesor en asuntos económicos e empresariais do equipo de Feijóo. Un punto que negan desde o PPdeG ao sinalar que o vicepresidente segundo segue a ser un "soporte imprescindible" do actual goberno. "O certo é que Paco é un home de Alberto e xa hai tempo que quere marchar a Madrid porque ten alí a sua vida montada", apuntan as fontes consultadas. "Non é polos novos desempeños de Alberto en Madrid, xa é algo de antes, pero, agora xa tería unha excusa para marchar", asegura.
Con todo, outros dirixentes aseguran que "non é o momento de que Conde marche agora" xa que a lexislatura entrou xa na súa última fase e o seu departamento, con temas tan importantes como a xestión dos fondos Next Generation, "é fundamental" para manter a estabilidade do actual goberno popular.
NOVO "GARDE DU CORPS"
Os que si marcharon, e en bloque, son todos os altos cargos da máxima confianza do xa ex presidente galego, o seu "garde du Corps" particular, comezando pola secretaria xeral de Medios, Mar Sánchez Sierra, e todo o seu equipo de comunicación particular, responsables de estratexia e discursos. De feito, Feijóo tamén leva a Madrid ata o de agora secretario xeral do PPdeG, Miguel Tellado.
Deste xeito, Rueda terá as mans libres para facer o seu equipo, tanto na Presidencia da Xunta como no propio PPdeG. E, de feito, as fontes consultadas apuntan que para dirixir o PPdeG podería situar á lucense Elena Candia que aspiraba a entrar como conselleira nesta lexislatura pero Feijóo decidiu deixala só como parlamentaria. Outro xeito para ir dando acomodo ás aspiracións dos "baróns" provinciais.
Con todo, o principal obxectivo do futuro presidente é facer e crear o seu propio equipo, o seu "modelo". Como el mesmo se encargou de dicir hai uns días, o seu goberno será continuista co de Feijóo pero co "modelo Rueda". Un modelo que dará a coñecer en breve.
QUINTANA E COMESAÑA A "DISPOSICIÓN" DE RUEDA
Os conselleiros de Mar e Sanidade en funcións, Rosa Quintana e Julio García Comesaña, están "a disposición" do que previsiblemente a próxima semana se converterá no novo presidente da Xunta, Alfonso Rueda, para continuar no seu goberno se así o decide.
En declaracións aos medios antes de participar nun acto en Santiago para relanzar a campaña saudable 'Vai de Peixe', a responsable de Mar insistiu en que é "importante deixar ao futuro presidente a liberdade suficiente para que elixa a persoas que considere máis adecuadas" para formar parte do seu equipo.
Pola súa banda, o titular de Sanidade, que foi un dos últimos en incorporarse ao Goberno galego da man de Feijóo --en setembro de 2020--, subscribiu as palabras de Quintana sen querer "engadir nada máis" e reiterou que tamén está "a disposición" do próximo presidente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.