Nova oferta pública de emprego do Concello da Coruña con cen prazas

O Concello da Coruña aprobará este mes a convocatoria de cen novas prazas de oferta pública de emprego para este ano 2022. Os postos de acceso libre son, entre outros, os de técnico de administración xeral (6), técnico medio de xestión (5), auxiliar administrativo (5), arquitecto superior (3) e axentes da policía local (20).

Segundo informa, do total de 100 novas prazas ofertadas, hai 53 que son de acceso libre. Hai tamén 16 prazas de estabilización ás que se accede por concurso-oposición e 31 prazas de promoción interna.

Por outra banda, existen outras 109 prazas de estabilización que corresponden a procesos abertos en anos anteriores e ás que se poderá optar por concurso público. Os procesos de estabilización permitirán, de acordo coa actual normativa, reducir a temporalidade do emprego público.

Nos últimos meses pecháronse diferentes procesos de promoción interna para máis de 200 persoas, entre persoal de Bombeiros e auxiliares administrativos. Por outra banda, está en marcha o proceso de selección de 22 prazas de Administración xeral (A1) e 17 de Técnicos de xestión (A2) froito da última convocatoria de emprego público municipal.

Oposicións á Xunta no recinto de Amio, en Santiago de Compostela | Fonte: XUNTA.