O PSdeG ofrece un acordo ao resto dos partidos para botar a Jácome de Ourense

O secretario xeral do PSdeG, Valentín González Formoso, apelou ao PP e aos demais partidos para alcanzar un acordo e "evitar" que o alcalde de Ourense, Gonzalo Pérez Jácome, "poida seguir representando á cidadanía" da cidade das Burgas.

A preguntas dos xornalistas, e sobre o comportamento do rexedor quen o mércores deu un empurrón a unha representante sindical de CCOO no inicio da folga de transporte urbano, trasladou a súa repulsa "á escena que deixou a Ourense á altura do betún no ámbito nacional".

"Por culpa dun representante que debería representar con dignidade, con educación e con respecto neste caso aos traballadores", sentenciou Formoso quen participará este xoves nunha manifestación en rexeitamento polo sucedido.

Por iso, dixo que o PSdeG estará "a reclamar a quen poida ter a solución para evitar que Jácome poida seguir representando á cidadanía de Ourense que sente nunha mesa e podamos chegar a un acordo aínda que quede un ano, un mes ou un día de lexislatura".

Formoso instou ás forzas políticas "sensatas, serias" e que entenden que as institucións deben ser "respectadas e respectables" a porse a traballar "e dar exemplo de dignificación".

Neste sentido, apelou a conversacións "con todas as forzas políticas que comparten esta visión de institucionalidad e de respecto". "Tamén do PP claro", dixo ao ser preguntado, nun acto na Coruña, se se refería a esta formación polo seu apoio ao goberno de Jácome.

PEGASUS

Por outra banda,  Formoso manifestou que os ataques de Pegasus, entre eles aos teléfonos do presidente do Goberno, Pedro Sánchez, e a ministra de Defensa, Margarita Robles, constatan que "hai certas enfermidades sociais e institucionais que hai que corrixir".