Piden que avogados condenados por violencia machista non poidan defender vítimas na quenda de oficio
A asociación condena a actitude do PPdeG, que este mércores votou en contra dunha iniciativa respecto diso no Parlamento galego.
Por Europa Press / Redacción | SANTIAGO DE COMPOSTELA | 05/05/2022 | Actualizada ás 13:06
A Federación de Asociacións de Mulleres Rurais de Galicia (Fademur) solicitou que os avogados condenados por violencia machista non poidan defender as mulleres vítimas de violencia de xénero na quenda de oficio especializado.
A este respecto, a asociación lamentou a "oposición" do PPdeG á posibilidade de que a Xunta de Galicia impulse unha normativa a este respecto. A federación condena así a "actitude" do grupo popular, que este mércores en comisión parlamentaria votou en contra dunha iniciativa presentada polo PSdeG e apoiada polos votos do BNG. "Non entendemos que os intereses partidistas poidan porse por diante do interese xeral, da seguridade e do dereito das mulleres vítimas de violencia machista a acceder a unha defensa xusta e empática", explican.
Tachan ademais de "sensentido" que os populares recoñezan a necesidade de regular a "anomalía xurídica" que permite que un letrado condenado por violencia de xénero asuma a defensa dunha vítima e, por outro, "se neguen a que a Xunta de Galicia exerza as súas competencias en xustiza para impulsar a normativa necesaria".
Remarcan ademais que hai dous meses o Ministerio de Xustiza informaba ao Defensor do Pobo de que estudaría as vías legais posibles para modificar a Lei 1/1996 de Xustiza Gratuíta e regular expresamente a necesidade de que os profesionais da quenda de oficio especializado en violencia de xénero carezan de antecedentes penais nese ámbito. Non comprenden que o Partido Popular "opte por romper o consenso existente e se opoña a que Galicia actúe nunha cuestión que conta cun amplo respaldo político e social".
Insiste a federación en que, igual que se fai cos profesionais que traballan con menores, se recolla como un requisito específico para aquelas persoas que queiran anotarse na quenda de oficio especializado en violencia de xénero a presentación dun certificado de penais actualizado que acredite que ese avogado non foi condenado por sentenza firme en relación cun delito deste tipo.
Ademais, consideran necesario que a ausencia de antecedentes deba acreditarse cada certo tempo. E demanda ademais que se establezca o deber de que os letrados que puideran ser condenados por violencia machista no período de tempo intermedio entre a organización das distintas quendas deban informar o Colexio de Avogados.
