BNG e CIG consideran que a lei de plans de pensións de emprego privatiza o sistema público

O BNG e a CIG rexeitaron o proxecto de lei de creación do fondo de pensións de emprego porque consideran que privatiza o sistema público de pensións. Este venres, o deputado da formación nacionalista no Congreso, Néstor Rego, e o secretario xeral da CIG, Paulo Carril, expuxeron na sede do BNG en Santiago de Compostela as emendas presentadas polo Bloque Nacionalista Galego a este proxecto de lei.

Os nacionalistas coincidiron en denunciar que suporá un "avance na privatización do servizo público de pensións" e criticaron que este proxecto de lei forma parte do proceso de reforma das pensións que leva a cabo o Goberno central e que "vai en correlación coa aprobación da non reforma laboral que mantén os aspectos máis lesivos das reformas de PSOE e PP".

"Estes fondos de pensións pretenden estender un sistema de pensións mixto ou semiprivado para que o sistema público de pensións pase a ser o complementario e o sistema privado sexa o fundamental", subliñou Néstor Rego.

Nesta mesma liña, censurou que as pensións públicas pasarían así a "ser un apoio para as persoas que tivesen unha menor prestación" e explicou que este novo fondo supón "diferir parte dos salarios dos traballadores para un plan colectivo de xestión privada".

Ademais, Néstor Rego cualificou de "inaceptable" que sexa o sector bancario o que administre estes plans de pensións. Neste sentido, criticou que se realice "unha xestión privatizada" e, por tanto, "máis negocio para a banca", algo que insistiu é "inxustificable". Así, demandou que todos os recursos públicos vaian encamiñados a "fortalecer o sistema público de pensións e non a fondos semi privados".

Así, despois de presentar no Congreso unha emenda á totalidade que xa foi rexeitada, o BNG presentou emendas parciais, en diálogo coa CIG, co obxectivo de que se privatice "o menos posible" e evitar "a dinámica de privatización". Entre elas, Rego destacou que o fondo sexa xestionado directamente pola Tesouraría da Seguridade Social e que non sexa un banco, ou que os depósitos poidan estar nunha entidade pública e non nunha entidade bancaria privada.

Por outra banda, tamén demandou que poida existir un control público da xestión de "estes fondos privados" e que este labor o leven a cabo "organismos tripartitos" nos que os sindicatos poidan participar".