Reganosa investirá máis de 16 millóns no seu terminal de gas natural licuado en Mugardos
Incorporará un novo sistema que "maximiza o aproveitamento da enerxía e permite prestar todo tipo de servizos en calquera momento"
Por E.P. | SANTIAGO DE COMPOSTELA | 09/05/2022 | Actualizada ás 10:45
Reganosa proxecta investir máis de 16 millóns no seu terminal de gas natural licuado (GNL) no municipio de Mugardos. Segundo informa a compañía, con ese orzamento incorporará ao complexo "un punteiro sistema que maximiza o aproveitamento da enerxía e permite prestar todo tipo de servizos loxísticos en calquera momento".
Esta actuación forma parte do programa de adaptación e modernización da planta, co que se buscará configurar ao redor das instalacións un 'hub' de GNL de referencia no noroeste peninsular. Dentro dos tanques de almacenamento das regasificadoras xéranse uns vapores coñecidos como BOG ('boil off gas') en xerga do sector. En circunstancias habituais, na planta de Mugardos esas existencias recupéranse como GNL nun equipo denominado relicuador e posteriormente intégranse na corrente que se regasifica e envía á rede de gasodutos de alta presión.
No entanto, en momentos puntuais de escasa emisión á rede por baixa demanda ou de parada por mantementos ou outras circunstancias, non todo o BOG pode ser relicuado e condiciona a operación da terminal.Reganosa pretende instalar agora un sistema de compresión que está deseñado para independizar o manexo deses vapores do nivel de regasificación da planta.
"É dicir, no futuro, sen importar o volume de emisión á rede que se estea levando a cabo, o complexo poderá ofrecer separadamente todo o catálogo de servizos previstos na regulación: postas en frío, cargas de grandes buques, aprovisionamentos de pequenos barcos, postas en gas...", explica a compañía.
AFORRO
De tal forma, "este avanzado compresor non só mellorará a flexibilidade e competitividade das instalacións, senón a súa eficiencia e sustentabilidade, ao maximizar o aproveitamento da enerxía". Calcúlase que poderían xerarse aforros medios anuais de 26 a 40 gigavatios por hora (GWh).
Polas súas características e vantaxes, o proxecto alíñase cos obxectivos que inspiran os últimos regulamentos europeos en materia de xestión de gases dentro do sector enerxético, así como cos desenvolvementos nacionais destes. A compañía xa iniciou os trámites administrativos para materializalo.
