Simulacro de ameaza de explosivos no aeroporto Rosalía de Castro de Santiago

O Aeroporto de Santiago - Rosalía de Castro foi escenario na mañá deste venres dun simulacro de ameaza de artefacto explosivo, a iniciativa da Axencia Estatal de Seguridade Aérea (AESA), coa activa participación do Ministerio de Transportes, do Ministerio do Interior, do Exército do Aire, de Aena, de ENAIRE e da Subdelegación do Goberno na Coruña.

O obxectivo perseguido con este tipo de exercicios, explica Aena, é manter adestrado o persoal involucrado nun suceso destas características e corroborar a idónea implantación da normativa aplicable. Ademais, obteranse conclusións que permitan mellorar o operativo en caso dun incidente real.

Os traballos de deseño e planificación deste simulacro, incluíndo unhas xornadas técnicas formativas, realizáronse con antelación e o exercicio levouse a cabo no momento en que o aeroporto estimou que non se producirían interferencias no normal desenvolvemento das operacións aeroportuarias.

O simulacro foi como segue: a primeira hora da mañá detectouse unha 'mochila sospeitosa' na zona restrinxida de seguridade do aeroporto, en plataforma, e efectuáronse os correspondentes avisos para activar os niveis de alerta.

As Forzas e Corpos de Seguridade do Estado confirmaron a veracidade da ameaza e implantáronse os protocolos de seguridade en vigor, acordoándose a zona e procedéndose á evacuación da área afectada.

Reuniuse con carácter inmediato o Comité de Crise local e os artificieiros da Garda Civil desactivaron o explosivo, dándose por concluído o incidente e desactivándose os dispositivos de seguridade. Todo isto, obviamente, como simulacro.