Máis de 1.600 axudas directas da Deputación da Coruña para paliar o impacto do incremento do combustible
A maior parte das axudas concedidas proveñen do sector do transporte de mercadorías, cun 40,2% do total, seguido do gandeiro (28,2%), o agrícola (26,5%) e o pesqueiro (3,3%). En canto á titularidade, o 70,2% foron presentadas por profesionais autónomos, mentres que o 29,8% restante proveñen de pemes e microempresas.
Por E.P. | A Coruña | 13/05/2022 | Actualizada ás 15:44
A Deputación da Coruña concedeu 1.666 axudas directas para paliar o impacto do incremento do custo do combustible aos sectores estratéxicos da provincia especialmente afectados: o agropecuario, o pesqueiro e o transporte de mercadorías.
O presidente provincial, Valentín González Formoso, fixo balance dos resultados da tramitación desta liña de subvencións e destacou a rapidez coa que se concederon as axudas."Entre sete horas e, como máximo, 11 días desde que presentaron a súa solicitude", detallou.
A día de hoxe, a Deputación da Coruña concedeu axudas directas de 3.000 euros a 1.666 solicitantes; concretamente, 1.281 foron para pemes, microempresas e persoas autónomas. As restantes están en trámite de pago e recibirán o ingreso nos próximos días.
A maior parte das axudas concedidas proveñen do sector do transporte de mercadorías, cun 40,2% do total, seguido do gandeiro (28,2%), o agrícola (26,5%) e o pesqueiro (3,3%). En canto á titularidade, o 70,2% foron presentadas por profesionais autónomos, mentres que o 29,8% restante proveñen de pemes e microempresas.
AXUDAS PEL 2022
Formoso tamén anunciou que 3.209 empresas e autónomos da provincia da Coruña presentaron este ano a solicitude para optar ás axudas PEL 2022, que conta cun orzamento de 7,2 millóns de euros. O prazo de recepción destas solicitudes permanecerá aberto ata o 11 de maio.
A maior parte das solicitudes dirixíronse á liña PEL-Autónom@s, cun total de 1.174. A través desta axuda, optan a unha subvención de ata 2.400 euros para sufragar ata un ano de cotas á Seguridade Social que xa non estean suxeitas a ningunha bonificación.
En canto a PEL-Emprende, presentáronse 1.018 solicitudes; no caso de PEL-Pemes, as axudas á contratación chegaron a 837 e no de mantemento de persoal recibiron 204.
Co obxectivo de chegar a un maior número de empresas, as axudas PEL 2022 incrementaron o seu orzamento inicial nun 38% respecto ao ano anterior, pasando de 5,26 millóns de euros a 7,26.
