A familia do home falecido na praia de Silgar, en Sanxenxo, pide medios para a investigación
Solicitan que se coloque un crespón negro nas bandeiras azuis do municipio mentres non se mellore a seguridade.
Por E.P. | A CORUÑA | 13/05/2022 | Actualizada ás 17:45
A familia de Juan Manuel Tábara Rodríguez, o oftalmólogo coruñés falecido tras ser golpeado por unha embarcación na praia de Silgar, en Sanxenxo, pediu ao delegado do Goberno en Galicia, José Miñones, medios para a investigación.
"Pedimos medios tecnolóxicos e recursos humanos para que a Garda Civil e o Xulgado de Cambados poidan avanzar no seu traballo", asegurou a Europa Press María, unha das irmás de Juan Manuel Tábara, tras unha reunión co delegado do Goberno.
Do encontro destacou que se os escoitou "atentamente" e que se tomou nota das súas peticións. Entre elas, estivo que se tomen "todas as medidas necesarias para que isto non lle ocorra a outra familia".
"Pedimos constatación de onde está custodiado o torpedo de lancha que esnaquizou a Juan", sinalou sobre a embarcación que golpeou o seu irmán. Ademais, solicitaron que "mentres non se demostre unha mellora da seguridade, se poña o crespón negro nas bandeiras azuis de Sanxenxo".
"Queremos que esas bandeiras teñan un significado real para a sociedade". "Bandeira azul é seguridade e Juan foi feito anacos na praia na zona de baño hai 28 días, que significa entón bandeira azul?", preguntouse.
Por outra banda, informou que este domingo, con motivo dun acto de homenaxe que celebrarán a praia de Silgar, ás 13,00 horas, puxeron a disposición autobuses desde A Coruña, con saída desde San Pedro de Mezonzo, ás 10,00 horas, e regreso de Sanxenxo, ás 17,00 horas. Tras a morte do seu irmán e polos feitos ocorridos detívose un veciño de Sanxenxo, de 36 anos, por presunto homicidio imprudente.
Pola súa banda, o delegado do Goberno manifestou que están "en contacto directo" coa familia "desde o primeiro momento". Sobre a reunión, dixo que o obxectivo foi "trasladarlles en primeira persoa" a información dispoñible e porse á súa "disposición". "Como levamos facendo ao longo deste último mes", apostilou.
