O sector da construción crece en emprego e licitacións de obra pública no 2021
A Coruña é a que concentra o maior número de empresas do sector, seguida de Pontevedra, Lugo e Ourense.
Por E.P. | SANTIAGO DE COMPOSTELA | 13/05/2022 | Actualizada ás 18:08
O sector da construción gañou un 3,2% de afiliados á Seguridade Social en Galicia en 2021, un ano no que as licitacións de obra pública creceron un 76,5%, segundo o Observatorio Industrial da Construción que acaba de publicar o Boletín anual de Estatísticas desta rama.
Nun comunicado, a Fundación Laboral da Construción informa de que o número medio de afiliados á Seguridade Social en construción durante 2021 en Galicia alcanzou os 77.833 traballadores (50.513 en Réxime Xeral e 27.320 autónomos), o que supón un incremento do 3,2% con respecto ao ano anterior, aínda que unha leve caída do 0,4% en comparación a 2019.
No que tocante ás empresas de construción inscritas na Seguridade Social en Galicia, en 2021 aumentaron un 2,9% fronte a 2020, cun total de 8.498. Son un 3,6% máis que en 2019. Supoñen máis do 10% das que se crean en Galicia.
Por provincias, A Coruña é a que concentra o maior número de empresas do sector (con 3.551), seguida de Pontevedra (3.146), Lugo (1.097) e Ourense (928). Así, as empresas do sector realizaron un total de 41.703 contratos de traballo, o que significa que o volume de contratación creceu un 15,6% en comparación con 2020, aínda que baixou un 7,9% respecto de 2019.
Entre as ocupacións cun maior número de contratos en 2021, encabezan a clasificación os albaneis, con 8.641 contratos (un 20,7% sobre o total), seguidos de peóns da construción de edificios (4.440) e electricistas da construción e afíns (2.679).
