O II Avoa Fest, romaría dos anos 50 e unha feira de cociña tradicional para recuperar os pratos das avoas

O evento gastronómico contará con sete postos de degustación de receitas típicas e incluirá campionatos de dominó e tute por parellas, clases para aprender a bailar ‘ajarrados’, alborada, música e animación da época e xogos tradicionais.

Por Galicia Confidencial | Pontevedra | 18/05/2022 | Actualizada ás 14:14

Comparte esta noticia

O II Avoa Fest pechará maio cunha romaría dos anos 50 na que, ademais dunha morea de postos de degustación de cociña tradicional, haberá alborada, música e animación da época, campionatos de dominó e tute por parellas, un curso para aprender a bailar ‘ajarrados’, xogos tradicionais e, por suposto, unha verbena á noitiña

Presentación do Avoa Fest
Presentación do Avoa Fest | Fonte: Concello de Pontevedra

 

Impulsado pola Concellería de Promoción Económica e Turismo, o festival naceu baixo o paraugas da marca Pontevedra Capital Gastro co obxectivo de poñer en valor as receitas tradicionais das nosas avoas, cunha primeira edición que incluíu uns inesquecibles Desafío Filloa e Árbore da Memoria, e regresa neste 2022 disposto a superarse cunha proposta que nos fará viaxar ao pasado. 

 

Unha nostálxica programación que se desenvolverá na xornada do sábado 28 de maio, entre as 12:00 e as 00:00 horas, no privilexiado escenario natural da Illa das Esculturas. “Un día enteiro de festa, de romaría, da mañá á noite, desas que se celebraban antes e que tamén forman parte do noso acervo cultural e etnográfico", explicou esta mañá no Concello de Pontevedra a edil de Promoción Económica, Yoya Blanco, durante o acto de presentación do festival.

 

Nunha comparecencia na que a socialista estivo acompañada polo concelleiro de Desenvolvemento Sostible e Medio Natural, Iván Puentes, Blanco avanzou que programa de actividades inaugurarase ás 12:00 horas coa apertura dos postos de comida e bebida, unha alborada e actuación da asociación cultural Vides Novas. Tamén haberá xogos tradicionais a cargo das diferentes asociacións de veciños de Pontevedra, que estarán apoiadas polos rapaces e rapazas da agrupación deportiva HQR!”. “Os postos de cociña deste Avoa Fest -indicou Yoya Blanco- foron ofertados á hostalería e empresas de alimentación da cidade, coa finalidade de impulsar, promover e poñer en valor a cociña tradicional e o seu tratamento por parte dos hostaleiros de Pontevedra”.

 

Tamén participará o grupo de gaitas Os Alegres e xa pola tarde, a partir das 17:00 horas, darán comezo os campionatos de dominó e tute por parellas. A partir das 22:00 horas haberá unha verbena que se prolongará ata medianoite e que lle porá a guinda a esta romaría dos anos 50.

 

“Ao pé do Lérez, moi preto da Illa das Esculturas, celebrouse toda a vida San Benitiño. Alí temos os salóns do Lérez -engadiu Iván Puentes, que están vencellados histórica e culturalmente a este tipo de tradicións", lembrou.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta