O Goberno ofrece axudas de ata 10.000€ para mercar casas en concellos pouco poboados
Están orientadas a compradores por debaixo dos 36 anos.
Por Europa Press / Redacción | SANTIAGO DE COMPOSTELA | 19/05/2022 | Actualizada ás 13:45
A subdelegada do Goberno na Coruña, María Rivas, lembrou este xoves que o Executivo estatal concederá axudas de ata 10.800 euros para os mozos que decidan adquirir unha vivenda de uso habitual en municipios de menos de 10.000 habitantes.
Segundo informan nun comunicado, esta subvención terá unha axuda de ata 360 euros ao mes naqueles casos en que se opte polo aluguer dunha vivenda no canto da súa compra. En todo caso, os beneficiarios serán aqueles mozos que no momento de solicitar a axuda teñan 35 anos ou menos.
Rivas reuniuse co alcalde de Dodro, Xabier Castro, co que repasou as principais necesidades do municipio. Entre elas, e dado que conta con menos de 10.000 habitantes, "afrontar o reto demográfico". En palabras da subdelegada, "a política de vivenda do Goberno será fundamental" a este respecto. Rivas destacou o impacto da medida na provincia coruñesa, "onde 70 concellos, tres de cada catro, entran dentro desta categoría de poboación".
REQUISITOS DAS AXUDAS
O mencionado programa é unha do trece iniciativas que forman parte do novo Plan Estatal de Acceso á Vivenda 2022-2025, que busca "atraer aos mozos aos municipios máis pequenos, facilitando o asentamento de poboación nestes ámbitos".
Para isto contémplanse dúas axudas: unha á compra de vivenda, de ata 10.800 euros ou ata o 20% do total do prezo da vivenda --que non deberá superar os 120.000 euros--; e unha ao aluguer durante cinco anos. Neste caso trátase dunha axuda mensual que cubrirá ata o 60% da renda mensual, ata un máximo de 360 euros. Esta será ademais compatible co bono de aluguer novo, de forma que se pode cubrir ata o 75% do custo do aluguer.
