Os ingresos por gripe confirmada superan os 400 en Galicia, dos que nove requiriron ir a UCI

Os ingresos de pacientes con gripe confirmada aumentan a 429 na tempada actual no conxunto de Galicia, dos cales nove requiriron hospitalización en Unidade de Coidados Intensivos (UCI).

Así se reflicte no informe de 'Vixilancia da Gripe en Galicia' publicado esta semana polo Sergas, recollido por Europa Press, no que se indica que dos 429 ingresos con gripe confirmada desde o principio desta tempada, 13 foron hospitalizados na semana 19 --que acabou o 15 de maio--. Isto implica, destaca o Servizo Galego de Saúde, "que xa son cinco as semanas de continuo descenso".

No que vai de tempada, das 17 persoas que faleceron co virus en toda a Comunidade galega, o Sergas puntualiza que se considera que catro morreron "por gripe".

En canto á vixilancia baseada nos rexistros de gripe en Atención Primaria do Sergas relativa á semana que terminou o 15 de maio, detéctase, respecto da anterior, "un lixeiro descenso na razón entre o número de persoas que consultaron (casos) por gripe e o número de médicos que as rexistraron, polo que a tendencia da actividade segue sendo estable no nivel baixo de intensidade".

Respecto diso, puntualízase no informe que a taxa de consultas no conxunto de Galicia "volve diminuír lixeiramente respecto da semana previa --nove versus seis casos por 100.000 habitantes--". Esta redución, indícase no documento, "é o resultado de pequenos cambios nas taxas de consulta tanto nos grupos de idade como nas provincias".

TIPO A

En canto á positividad das mostras estudadas na última semana para o virus do tipo A descendeu un pouco "máis" ata o 1,2%. O Sergas incide en que o virus predominante durante a tempada "é tipo A".

A ese tipo A corresponde "practicamente a totalidade dos diagnósticos", e dos que foron subtipados, todos son do subtipo A(H3N2), que, lembra a Administración sanitaria, "non predominaba en Galicia desde a tempada 2018/19".

Enfermeira fornecendo unha vacina / Europa Press. / Europa Press