O Sergas comeza a administrar os antivirais da covid: en que consisten?
Dende o pasado 28 de marzo, dispensáronse pouco máis de 300 tratamentos.
Por E.P. | SANTIAGO DE COMPOSTELA | 22/05/2022 | Actualizada ás 12:00
O Servizo Galego de Saúde dispensou un total de 318 tratamentos dos antivirais contra a Covid-19, 'Paxlovid' e 'Evusheld' aos usuarios dos centros sanitarios galegos, desde que o pasado 28 de marzo Galicia recibira a primeira remesa destes medicamentos.
A Consellería de Sanidade detallou que, por áreas sanitarias, na da Coruña e Cee dispensáronse 60 tratamentos; na de Vigo, 58; na de Santiago e Barbanza, 29; na de Ferrol, 24; na de Lugo, A Mariña e Monforte de Lemos, 80; na de Pontevedra e O Salnés, 14; e na área sanitaria de Ourense, Verín e O Barco de Valdeorras, 53 tratamentos.
Ambos os fármacos engadíronse a principios de abril ás vacinas e a outros medicamentos para evitar que pacientes positivos cuns determinados condicionantes puidesen evolucionar cara a un estado grave da enfermidade e ademais previr as hospitalizacións en pacientes con sintomatología leve.
Nunha nota de prensa, Sanidade concretou que 'Paxlovid' é un medicamento que se subministra baixo prescrición médica e que seadministra vía oral. Así, posibilita un tratamento ambulatorio para aqueles pacientes leves que contan con factores de risco para evolucionar cara a unha Covid-19 grave, á vez que permite controlar a progresión da infección.
Por outra banda, 'Evusheld' é un fármaco que se administra vía intramuscular con dúas inxeccións que está dirixido a persoas adultas inmunodeprimidas. Este fármaco está indicado como profilaxe pre-exposición, e contribúe a previr a infección e o risco de desenvolver complicacións con motivo do coronavirus.
