As familias dos mariñeiros do Pitanxo reuniranse co Centro de Rescate de Canadá
A portavoz, María José de Pazos, subliñou a importancia de que se "dote de contido" esta reunión e se permita enviar por adiantado unha serie de preguntas ás autoridades canadenses.
Por E.P. | VIGO | 23/05/2022 | Actualizada ás 19:00
A Delegación do Goberno de Galicia confirmou ás familias dos 21 falecidos no naufraxio do pesqueiro galego 'Villa de Pitanxo', que afundiu o pasado 15 de febreiro a 450 quilómetros ao leste de Terranova (Canadá), que se reunirán coas autoridades do centro de salvamento de Halifax de Canadá, o cal axudou nas operacións de rescate nos días posteriores á traxedia.
Esta tarde, a Delegación do Goberno confirmou ás familias dos mariñeiros que "nas próximas datas" poderán manter unha reunión por videoconferencia con ditas autoridades, tal como solicitaron hai meses. "A falta de fixar a data definitiva, a celebración da reunión telemática está pechada tras as xestións realizadas entre o Goberno de España e o de Canadá, despois de ser trasladada esta petición das familias por parte do delegado do Goberno en Galicia, José Miñones", reivindicou a Delegación.
A portavoz das familias, María José de Pazos, subliñou a importancia de que se "dote de contido" esta reunión e se permita enviar por adiantado unha serie de preguntas ás autoridades canadenses para que poidan respondelas o día acordado. Tamén solicitou que se consensúe unha data, polo "temor" a que se marque un día e moitos familiares non poidan asistir, como ocorreu noutras ocasións.
