Por E.P. | SANTIAGO DE COMPOSTELA | 25/05/2022 | Actualizada ás 18:13
O Parlamento de Galicia instou á Xunta a demandar ao Estado a protección do sector pesqueiro da "ameaza" da instalación de eólica mariña en caladoiros, así como a garantir a "coexistencia" entre ambas as actividades "sempre que sexa posible".
Igualmente, ínstase ao Consello Superior de Investigacións Científicas (CSIC) e ao Instituto Español de Oceanografía (IEO) a avaliar o impacto da instalación de polígonos de eólica mariña sobre os recursos pesqueiros e as zonas de traballo das diferentes artes e segmentos de frota que operan no caladoiro do Cantábrico Noroeste e os seus efectos sobre a economía das comunidades pesqueiras.
Este texto foi aprobado por unanimidade tras unha iniciativa do BNG que foi transaccionada. A proposta do Bloque toma como referencia o texto 'Manifesto de Burela na defensa do sector pesqueiro do Cantábrico Noroeste', pero durante o debate a deputada nacionalista Rosana Pérez cruzou reproches con Marta Nóvoa (PP) e Patricia Otero (PSdeG) sobre a interpretación dese manifesto.
Neste sentido, Rosana Pérez expuxo que o Bloque asume na súa integridade o manifesto e apunta que obtivo apoio dos tres grupos con representación na Cámara, pero reprocha "nin PP nin PSOE" o trouxeron á Cámara para que sexa aprobado como proposición. A proposta orixinal do Bloque non falaba da "coexistencia" entre sector pesqueiro e eólica mariña, cuestión que si foi incluída na iniciativa aprobada finalmente ao transaccionarse co PP.
Respecto diso, a deputada socialista Patricia Otero acusou o Bloque de "manipular e terxiversar" o manifesto coa súa proposta para defender "as teses do BNG" relativas á eolica mariña: "O non polo non". A continuación, Marta Nóvoa tomou a palabra para apoiar a intervención de Patricia Otero. "Subscribo as súas palabras de principio a fin", afirmou. E é que considera que Rosana Pérez "dun modo torticeiro manipulou o manifesto que foi entregado a todos os grupos".
Na súa réplica, Rosana Pérez dixo "lamentar profundamente a actitude" de PP e PSOE. Dirixiuse a Patricia Otero para dicirlle que é a "primeira vez en dous anos que vexo esta hostilidade". "Lévame a pensar que vostedes atoparon un cravo ardendo ao que agarrarse para xustificar que están a compartir o argumentario do PP", dixo a nacionalista á socialista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.