Aprazado o xuízo contra unha muller que estafou 72.000 euros simulando ser a súa moza por Internet
O home tiña unha dependencia emocional dela a pesar de non coñecela físicamente.
Por Europa Press / Redacción | A CORUÑA | 26/05/2022 | Actualizada ás 11:01
O xuízo contra unha muller que, presuntamente, estafou diñeiro a un home co que contactou por Internet e co que finxiu que se quería ir vivir quedou aprazado ao atoparse ela en busca e captura. A vista estaba previsto que se celebrase este xoves na sección segunda da Audiencia Provincial da Coruña.
De acordo co escrito de cualificación fiscal, en setembro de 2017, a vítima decidiu pór un anuncio na sección de contactos dun xornal dixital no que fixo constar que necesitaba compañía, deixando o seu número de teléfono por se algunha muller estivese a buscar o mesmo que el e co obxectivo de conseguir unha relación estable de parella.
A acusada, con residencia en Leganés, viu o anuncio e púxose en contacto con el facendo crer que estaba interesada nesa relación estable e que tiña intención de trasladarse ata A Coruña para vivir xuntos e casar "cando en realidade o único que buscaba era conseguir --do home-- a maior cantidade de diñeiro posible".
Para iso, engade o Ministerio Público, convenceuno de que se namorou del para, a continuación, comunicarlle "diversas adversidades ficticias das que era vítima ata conseguir un estado de dependencia emocional, momento que aproveitou para solicitarlle diversas cantidades de diñeiro".
En concreto, indica que o home lle chegou a transferir 71.900 euros, "que a acusada ía retirando e dispondo en canto chegaban á conta bancaria da súa titularidade ata deixala sen fondos". Para obtelo, sostén que lle dicía "unha serie de situacións que non se correspondían coa realidade" como que os seus pais ían perder a casa en Romanía e que ela non tiña diñeiro suficiente para axudalos ou que o seu pai fora ingresado.
O Ministerio Público indica que a vítima, para conseguir o diñeiro, "solicitou 20 préstamos a distintas entidades por un importe total de 38.749,53 euros". Cando xa non puido lograr máis, ela deixou de contactar con el ata que, con posterioridade, volveu pedirlle 15.000 euros "para custear unhas inxeccións que se vendían só en Estados Unidos". Nese momento o home "xa se decatou de que todo o que lle dicía era mentira polo que non lle entregou ningunha cantidade de diñeiro", argumenta Fiscalía.
