Bugallo desvelará en xullo se opta á reelección, pero apunta: "Estou en perfectas condicións"

Cifra nuns 200 os procedementos xudiciais a pisos turísticos na cidade e avisa: "Non podemos admitir que a vivenda sexa simplemente un negocio" Asegura que o PSdeG está "infinitamente mellor" tras a vitoria de Formoso, a quen valora como candidato á Presidencia da Xunta.

Por Europa Press / Redacción | SANTIAGO DE COMPOSTELA | 26/05/2022 | Actualizada ás 12:43

Comparte esta noticia

O alcalde de Santiago de Compostela, o socialista Xosé Sánchez Bugallo (Curtis, 1954), desvelará en xullo se opta á reelección nos comicios municipais que se celebrarán en maio de 2023 aínda que apunta que se ve en "perfectas condicións de ánimo e físicas" para seguir ostentando esta responsabilidade.

"Direi cal é a miña dispoñibilidade e a miña opinión sobre a conveniencia e a oportunidade no mes de xullo para que, entre todos (en referencia aos seus compañeiros do PSOE local), poidamos tomar a decisión mellor para Santiago", explica nunha entrevista concedida a Europa Press a un ano da celebración das eleccións locais.

O rexedor compostelán, que actualmente afronta o que é o seu quinto mandato como alcalde da capital galega, destaca tamén que "hai persoas" que están no seu equipo que "poderían liderar perfectamente un proxecto" no que el estaría "encantado de colaborar". E é que, segundo sinala, "chegados a estas alturas" da súa vida "o único" que "non" ten é "ambición persoal". "O que si conservo é toda a vocación de servizo ao meu municipio, aos cidadáns e ao país", subliña.

Con todo, sostén que lle causa unha "gran tristeza" e unha "certa preocupación" ver a "todos os grupos nunha campaña permanente a un ano das eleccións". "Paréceme un disparate. Ningunha cidade pode permitirse o luxo de botarse un ano ou un ano e pico en campaña electoral", argumenta.

SANTIAGO "RECUPEROU A NORMALIDADE"

Así mesmo, reflexiona sobre este últimos tres anos de mandato, nos que volveu asumir o bastón de mando tras un período no que gobernou primeiro o Partido Popular e despois Compostela Aberta, para destacar que se logrou unha "recuperación da normalidade" nun escenario "completamente atípico".

"O do Concello de Santiago é un goberno que funciona con normalidade, que ten unhas relacións normalizadas co resto de institucións públicas e no que se dá resolución aos problemas que levaban anos estancados na cidade sen que os gobernos que houbo entre o 2011 e o 2019 fosen capaces de atopar unha solución", destaca.

Tras pór en valor o desbloqueo de asuntos como a Edar, a ligazón Orbital e a construción da terminal de viaxeiros, cita proxectos nos que traballa actualmente o seu goberno e que espera que se poidan pechar proximamente, como a operación Peleteiro, o centro de distribución de mercadorías e a construción do parque de bombeiros.

Así mesmo, explica que hai outros temas que "están quedando aínda pendentes" como a reforma da administración electrónica e recoñece que o desenvolvemento dalgunhas obras, como a de Concheiros, puido prexudicar a imaxe do seu goberno. Con todo, reduce a responsabilidade do consistorio ao sinalar que se trata de actuacións "enormemente complexas", nas que houbo que introducir "cambios moi significativos" e lembra que tamén se producen demoras en proxectos que dependen de institucións como a Xunta, como o caso das obras en Rodríguez de Viguri.

MÁIS DE 200 PROCEDEMENTOS ABERTOS A PISOS TURÍSTICOS

Na entrevista concedida a Europa Press na semana na que a capital galega celebra as súas festas da Ascensión, Bugallo aborda a problemática dos pisos turísticos e explica que na cidade hai uns "200 procedementos xudiciais abertos" sobre os que hai "sentenzas contraditorias".

"Por parte do Concello de Santiago houbo sempre unha posición clara, tanto deste goberno como do anterior; pero, desgraciadamente, por parte da Administración de Xustiza non houbo unha visión tan clara de principio", considera. Con todo, cre que o tema "se está clarificando" unha vez que o TSXG "fixou criterio" con dúas sentenzas que "avalan as teses municipais" e darán sustento ás accións do concello, como a modificación do plan xeral na que traballan para regular espazos.

"O noso criterio non é que non haxa pisos turísticos. O noso criterio é que os pisos turísticos non poden ser o elemento fundamental de uso da vivenda en Santiago. Non podemos admitir que a vivenda sexa simplemente un negocio e non sexa vivenda", sinala Bugallo, que se mostra disposto a regular o asunto e abrir a posibilidade de facer pisos turísticos en "determinadas condicións". "Mesmo que pisos que se destinan a aluguer de estudantes durante 9 ou 10 meses, que poidan destinarse durante dous meses a uso turístico, ese é o noso obxectivo", indicou.

Preguntado pola existencia de numerosos edificios en desuso no centro histórico, algúns emblemáticos como o da antiga Sala Yago e o que albergou a biblioteca de Caixa Madrid, explica que "hai dous problemas" que afectan "severamente" á zona vella: a falta de acordo entre herdeiros e que "case todos os propietarios deses edificios precisamente o que queren é un cambio de cualificación para poder destinalo a un uso turístico".

Así as cousas, explica que a normativa vixente en Galicia permite a creación dun "rexistro municipal de solares" e "a posibilidade de expropiar eses edificios". "Actualmente temos varios no rexistro municipal de solares e temos aprobado e dotado de orzamento recuperar a empresa municipal de vivenda e chan como instrumento para facer efectiva a expropiación deses edificios", detalla.

CAMBIO NA XUNTA

Preguntado polo cambio na Presidencia da Xunta tras a marcha de Alberto Núñez Feijóo para liderar o PP e a elección de Alfonso Rueda como xefe do Executivo galego, o alcalde de Santiago asegura que se trata dun asunto que non foi "exactamente previsible" e ve "razoable" que se producise o cambio.

"Non comparto a idea de que o correcto fose convocar eleccións anticipadas, porque creo que os mandatos se fan para cumprilos. Hai unha maioría sólida do partido político que sustenta o goberno actual --en referencia ao PPdeG-- e, por tanto, tampouco vexo unha necesidade obxectiva de que se celebren eleccións", sinala.

Tras iso, sinala que sempre tivo "unha relación cordial, máis que correcta" co novo presidente da Xunta, Alfonso Rueda, a quen coñece "desde os anos 90", e confía que, "como presidente iso sexa así e, ése posible, mellor". "Sempre é bo para os cidadáns que exista a maior comunicación posible entre os seus diferentes niveis de goberno", apunta.

VE O PSDEG "INFINITAMENTE MELLOR" CON FORMOSO Á FRONTE

Na entrevista concedida a Europa Press, Xosé Sánchez Bugallo asegura que o PSdeG está "infinitamente mellor" tras a vitoria nas primarias á Secretaría Xeral de de Valentín González Formoso, sobre quen considera que "concita todas as adhesións" para ser o candidato á Presidencia da Xunta nas eleccións autonómicas.

O alcalde de Santiago de Compostela, Xosé Sánchez Bugallo, nunha entrevista con Europa Press. EUROPA PRESS / CÉSAR ARXINA / Europa Press
O alcalde de Santiago de Compostela, Xosé Sánchez Bugallo, nunha entrevista con Europa Press. EUROPA PRESS / CÉSAR ARXINA / Europa Press

Ademais, cre que a marcha de Feijóo abre "un espazo de oportunidade para o cambio" en Galicia. "E teño claro que o cambio ou pivota sobre o PSdeG ou previsiblemente non se vai producir", destaca, para asegurar que "a sociedade galega non é unha sociedade á que lle gusten os grandes cambios nin as propostas estrenduosas". "É dicir, é unha sociedade madura, cun certo punto conservador, que o que quere é un cambio tranquilo e con garantías", apunta.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta