O Goberno central estuda prorrogar a limitación para que os alugueres de vivendas non suban máis dun 2%

O Goberno non descarta prorrogar máis aló do 30 de xuño a limitación actualmente en vigor de non poder subir os alugueres de vivendas máis dun 2% nas actualizacións de rendas, dada a situación na que aínda se atopa a inflación como consecuencia da guerra en Ucraína. Así o avanzou a ministra de Transportes, Mobilidade e Axenda Urbana, Raquel Sánchez, en declaracións á prensa desde o Salón Inmobiliario de Madrid (SIMA), onde defendeu que "ten lóxica" que o Goberno manteña esta medida ante o escenario actual, que non mudou moito desde que se aprobou hai dous meses.

"Se non hai cambios nas circunstancias, sobre todo nas medidas de carácter social, ten lóxica que o Goberno as manteña. Ante este escenario, o Goberno prorrogará as medidas que sexan necesarias para tentar amortecer o efecto negativo da crise, entre elas a limitación alugueres, que ten carácter social e que axuda á xente a soportar esta situación", sinalou.

Preguntada polo bono ao aluguer dos mozos, a ministra explicou que o Ministerio xa transferiu os fondos ás comunidades autónomas e que deben ser estas as que nos próximos días lancen as convocatorias. En calquera caso, a súa efectividade terá efectos retroactivos desde o pasado 1 de xaneiro.

En canto á ameaza dunha posible burbulla inmobiliaria, Sánchez asegurou que o Goberno xa está a introducir novas ferramentas e instrumentos para evitar calquera estalido, aínda que resaltou que na última crise financeira, desatada principalmente desde o sector inmobiliario, houbo moitos compoñentes.

A ministra tamén se referiu a a Lei de Vivenda, dicindo que "non vai en contra de ninguén e non ataca o sector", tras as críticas vertidas desde varios ámbitos inmobiliarios e desde o espectro político, engadindo que "se necesita seguridade xurídica pero tamén protexer ao cidadán".