Por E.P. | VIGO | 26/05/2022 | Actualizada ás 20:41
A Universidade de Santiago de Compostela (USC) fixo entrega este xoves das súas Insignias de Ouro, o seu máximo recoñecemento, aos profesores António Cândido Macedo de Oliveira, Giampaolo Rossi e Jean-Bernard Auby, polas súas achegas fundamentais para o avance da ciencia do Dereito Público e Administrativo.
As insignias foron impostas polo reitor da institución académica compostelá, Antonio López, nun acto celebrado no Colexio de Fonseca. Estas distincións que outorga a USC pretenden recoñecer a continuada e intensa relación destes tres profesores coa Universidade de Santiago, e o seu apoio na formación do seu persoal docente e investigador, e no desenvolvemento de numerosas actividades científicas.
António Cândido Macedo de Oliveira foi catedrático na Escola de Dereito da Universidade do Minho e director da Facultade de Dereito e Ciencia Política da Universidade Lusófona do Porto. Na USC, colaborou en diversos ámbitos: recepción de persoal investigador para estancias pre e postdoutorais, apoio á internacionalización do programa de doutoramento en Dereito, organización de seminarios, xornadas e congresos, entre outras actividades.
Jean-Bernard Auby foi profesor na Universidade de Paris II (Panthéon-Assas) (1994- 2006), en Paris XII (1987-1994) e na Universidade de Rennes I (1983-1987). Así mesmo, colaborou coa USC en proxectos de investigación do Plan Nacional de I+D e, en 2019, confiou á institución santiaguesa a sede dunha das tres redes de investigación nas que se segregou a súa cátedra tras a súa xubilación.
O profesor Giampaolo Rossi pasou longas tempadas en Santiago estudando e escribindo artigos científicos, e participou no Congreso da Asociación de Profesores de Dereito Administrativo de España en 2014. Fundou e dirixiu o Doutoramento en Dereito Administrativo e o Master en Dereito Ambiental da Universidade de Roma 3 e puxo en marcha o Observatorio Europeo da Contratación Pública no Centro de Excelencia desta universidade, entre outros logros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.