O BNG presentará alegacións ao decreto lei sobre eólicos que "impide á cidadanía sequera protestar"
Medio Ambiente di que o seu órgano consultivo non pode votar a iniciativa de eólicos pero elevaraa ao Goberno central.
Por E.P. | Santiago de Compostela | 31/05/2022 | Actualizada ás 15:04
O deputado do BNG, Néstor Rego, nunha intervención ante a prensa fixo referencia ao decreto lei 6/2022, que agora se vai tramitar como proxecto lexislativo. Rego lembrou que no decreto bastan con informes de impacto da propia empresa que quere instalar muíños, o que impide que os cidadáns poidan "sequera protestar ou presentar as súas alegacións". "É como pór ao raposo a vixiar o galiñeiro", salientou Rego, que ratificou que o BNG rexistrou emendas para suprimir esas modificacións (a eliminación dos informes de impacto ambiental) e volver a unha situación anterior.
O deputado nacionalista sinalou que a instalación de parques eólicos per se non vai abaratar o custo da enerxía, senón que iso pasa por un cambio da tarificación. Por iso, e tras reivindicar a "persistencia" do BNG para conseguir que se tramite o decreto como proxecto lexislativo, tamén avanzou que traballará para unha "nova regulación" que dea "máis garantías" de protección ambiental e social. Iso si, esixiu ao Goberno de Sánchez que o proxecto lexislativo "non quede nun caixón". "Imos estar atentos", aseverou.
MEDIO AMBIENTE
A conselleira de Medio Ambiente, Ángeles Vázquez, esgrimiu un informe dos servizos xurídicos para indicar que "por imperativo legal" a natureza dos acordos adoptados polo Consello Galego de Medio Ambiente (Cogamads) só poden ser ditames e consultas. Con todo, comprometeuse a trasladar a preocupación sobre a adxudicación de concesións eólicas ao Goberno central.
As tres asociacións ecoloxistas con representación neste órgano consultivo plantaron, "por hixiene democrática", este consello ata que a Presidenta se decida a debater unhas propostas sobre a eliminación dos informes de impacto ambiental para a instalación de parques eólicos.
Este asunto remóntase a xaneiro deste ano, cando na reunión do día 26, a conselleira, segundo denunciaron as asociacións ecoloxistas, "abandonou" a reunión sen que se abordasen as súas peticións, nun corte "abrupto" do encontro.
Aínda que na deste 31 de maio non estaban as asociacións, segundo informou a consellería, Vázquez "aceptou a petición" de trasladar ao Goberno central "a preocupación que está a xerar" a eliminación da participación pública na tramitación de certos parques eólicos, en vigor por decreto lei desde marzo (e que agora se tramita como proxecto lexislativo).
