Rueda di que a gratuidade das escolas infantís aforrará entre 1.500 e 2.000 euros por crianza
Xa se publicaron as listaxes definitivas de admitidos nas 174 escolas, cun total de 8.000 menores.
Por E.P. | SANTIAGO DE COMPOSTELA | 31/05/2022 | Actualizada ás 18:06
O presidente da Xunta, Alfonso Rueda, destacou este martes que a gratuidade da educación infantil contribuirá á economía dos fogares, cun aforro medio anual de entre 1.500 e 2.000 euros de media por neno. Rueda fixo esta valoración na súa primeira visita oficial como presidente da Xunta á súa cidade, concretamente, á escola infantil de Campolongo, onde acudiu acompañado pola conselleira de Política Social e Xuventude, Fabiola García.
En declaracións aos xornalistas, Alfonso Rueda lembrou que Galicia será pioneira na educación infantil 100% gratuíta, xa sexa en centros públicos, en privados ou de iniciativa social. O presidente do Executivo autonómico precisou que esta iniciativa suporá un orzamento anual de 50 millóns de euros e beneficiará a máis de 30.000 crianzas. Neste sentido, o titular do Goberno galego aseverou que este esforzo investidor "non podía chegar nun momento máis necesario", no que os prezos volven subir.
ADMITIDOS
Pola súa banda, Fabiola García lembrou que este mesmo martes se publicaron as listaxes definitivas de admitidos nas 174 escolas infantís, cun total de 8.000 menores. O prazo para formalizar a matrícula vai do 1 ao 10 de xuño. A listaxe de admitidos pódese consultar na páxina web da Consellería de Política Social.
