Denuncian o uso dun evento "feminista" para amparar as desfeitas ambientais do lobby mineiro

No "Simposio Mujer y Minería" participan responsábeis polas polémicas minas de Touro, San Finx, Varilongo ou Penouta, todas elas sancionadas por infraccións ambientais.

Por Galicia Confidencial | Compostela | 01/06/2022 | Actualizada ás 11:01

Comparte esta noticia

Ecoloxistas en Acción denuncia que a Cámara Oficial Mineira e o colexio de enxeñería técnica de minas, co patrocinio da Xunta, usan como pretesto un "discurso feminista" para amparar as súas desfeitas ambientais.

Mina de Touro
Mina de Touro | Fonte: Ecoloxistas en Acción

Así, nun comunicado lembra que este mes de xuño o lobby mineiro organizará na Cidade da Cultura o “Simposio Mujer y Minería”, "un evento por todo o alto patrocinado pola Xunta de Galicia e no que os almorzos, aperitivos e ceas-cóctel corren a conta de Cobre San Rafael, Strategic Minerals e ERIMSA, todas elas empresas que veñen de ser sancionadas en múltiples ocasións por vulneracións ambientais".

Por iso, desde Ecoloxistas en Acción critican o “vergoñento exercicio de purplewashing, ou lavado de cara lila, do lobby mineiro que se pretende usar un discurso pretendidamente feminista para amparar a destrución ambiental”. De feito, no programa aparecen, xunto cos cargos da Xunta, representantes de varias empresas mineiras implicadas en procesos xudiciais ou sancionadores por infraccións contra o ambiente.

De Rafaella Resources, empresa australiana das polémicas minas de San Finx e Santa Comba, que acumulan máis de media ducia de procesos xudiciais, intervirán Susana García Sánchez e Ana Monteserín Losas, mentres que por Strategic Minerals, a empresa canadense que leva acumulados tres expedientes sancionadores da Confederación Hidrográfica do Miño-Sil pola súa actividade na Penouta, intervirá Elena Terreón García.

"Outras empresas, como Cobre San Rafael, responsábel polo fracasado proxecto de reapertura da mina de Touro, tiveron que limitarse a participar co seu patrocinio, ao teren un cadro de persoal totalmente masculinizado, evidenciando o espectáculo vergoñento que supoñen este tipo de eventos", di.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta