Por E.P. | SANTIAGO DE COMPOSTELA | 02/06/2022 | Actualizada ás 15:51
A portavoz nacional do BNG, Ana Pontón, mantivo este xoves en Pontevedra un encontro con colectivos, plataformas e asociacións afectadas polo que definiu como "espolio eólico especulativo e depredador" e con cuxos integrantes compartiu as propostas do Bloque para un desenvolvemento eólico "a favor do país e sustentable no social, no económico e no ambiental".
No encontro tamén participou o alcalde de Pontevedra, Miguel Anxo Fernández Lores, e o portavoz parlamentario de Medio Ambiente, Luís Bará.
A portavoz do BNG diferenciou "dúas formas de entender o desenvolvemento eólico de Galicia", o da formación nacionalista e o do Partido Popular, "que está a promover un bum eólico especulativo e depredador, que non respecta o territorio e vai en contra da xente do medio rural" e que, segundo asegurou, "está ao servizo do lobby enerxético desas empresas que nos están estafando nesta crise".
En fronte, situou o modelo que defende o Bloque, que está "en consonancia cun movemento social moi importante" e que propón que "a eólica ten cabida en Galicia" pero non tal e como está exposta senón que "ten que ser un modelo respectuoso co medio ambiente, coa xente que vive no medio rural" e ademais que poña a enerxía "ao servizo do país".
PARTICIPACIÓN PÚBLICA
Para a portavoz nacional do BNG é necesario que este modelo faga unha planificación do territorio, que os proxectos estean vinculados "a iniciativas de tipo industrial", que unha parte dos compoñentes deses parques se fabriquen en Galicia, e que a enerxía se utilice para o desenvolvemento económico.
Isto, dixo, estaría asegurado cunha participación pública nos proxectos que "non ten que ser só a Xunta, tamén pode ser de concellos" e mesmo doutras entidades de ámbito local. Ademais, tamén avoga o Bloque por modelos de autoconsumo e comunidades enerxéticas.
O BNG rexeita que só o 5% dos beneficios da industria eólica instalada neste territorio quede en Galicia e que o 95% restante, "que é unha barbaridade", estea "a emigrar".
"O que estamos a ver neste momento é que ao espolio de toda a vida pónselle a etiqueta verde, e iso é o que está a facer o Partido Popular e é unha auténtica aberración", dixo Ana Pontón. "O PP no canto de estar a pensar en Galicia está a pensar nas portas giratorias das empresas eléctricas", engadiu.
A líder nacionalista asegurou que aínda se está "a tempo de parar este bum eólico depredador e pór a enerxía ao servizo da sociedade". Por iso, os nacionalistas van expor este debate en todas as institucións e en todos os ámbitos "porque este é un tema de país", recalcou.
Neste sentido, Ana Pontón animou á cidadanía a participar o vindeiro domingo 5 de xuño, Día do Medio Ambiente, na mobilización convocada en Santiago de Compostela por entidades ecoloxistas, veciñais, sociais, sindicais e políticas, agrupadas ao redor da Coordinadora Eólica Así Non.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.